ਲਾਹੌਰ- ਘੱਟ ਗਿਣਤੀ ਈਸਾਈ ਭਾਈਚਾਰਾ ਪਾਕਿਸਤਾਨ ਵਿਚ ਬਿਲਕੁੱਲ ਵੀ ਸੁਰੱਖਿਅਤ ਨਹੀਂ ਹੈ। ਤਾਜ਼ਾ ਜਾਣਕਾਰੀ ਮੁਤਾਬਕ ਪਾਕਿਸਤਾਨ ਦੇ ਪੰਜਾਬ ਸੂਬੇ ਵਿੱਚ ਇੱਕ ਪ੍ਰਭਾਵਸ਼ਾਲੀ ਸਥਾਨਕ ਵਿਅਕਤੀ ਦੀ ਇਮਾਰਤੀ ਸਮੱਗਰੀ ਹਟਾਉਣ ਤੋਂ ਇਨਕਾਰ ਕਰਨ ‘ਤੇ ਇੱਕ ਈਸਾਈ ਸੈਨੇਟਰੀ ਵਰਕਰ ਨੂੰ ਲੋਕਾਂ ਦੇ ਇੱਕ ਸਮੂਹ ਨੇ ਬੇਰਹਿਮੀ ਨਾਲ ਕੁੱਟਿਆ। ਪੁਲਿਸ ਨੇ ਇਸ ਸਬੰਧੀ ਜਾਣਕਾਰੀ ਦਿੱਤੀ।
ਪੁਲਿਸ ਅਧਿਕਾਰੀ ਅਬਦੁਰ ਰਜ਼ਾਕ ਪਾਰਸ ਨੇ ਪੀ.ਟੀ.ਆਈ. ਨੂੰ ਦੱਸਿਆ ਕਿ ਸ਼ੱਕੀ ਸਾਕਿਬ ਰੱਬਾਨੀ ਨੇ ਲਾਹੌਰ ਤੋਂ ਲਗਭਗ 400 ਕਿਲੋਮੀਟਰ ਦੂਰ ਰਹੀਮ ਯਾਰ ਖਾਨ ਦੀ ਸਾਦਿਕਾਬਾਦ ਤਹਿਸੀਲ ਵਿੱਚ ਸੜਕ ਕਿਨਾਰੇ ਪਈ ਇਮਾਰਤੀ ਸਮੱਗਰੀ ਨੂੰ ਹਟਾਉਣ ਲਈ ਸ਼ਾਹਿਦ ਮਸੀਹ ਨੂੰ ਕਿਹਾ ਸੀ। ਜਦੋਂ ਮਸੀਹ ਨੇ ਉਸਨੂੰ ਦੱਸਿਆ ਕਿ ਸੜਕਾਂ ਤੋਂ ਇਮਾਰਤੀ ਸਮੱਗਰੀ ਹਟਾਉਣਾ ਉਸਦਾ ਕੰਮ ਨਹੀਂ ਹੈ, ਤਾਂ ਰੱਬਾਨੀ ਅਤੇ 15 ਹੋਰ ਲੋਕਾਂ ਨੇ ਉਸਨੂੰ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਪੁਲਿਸ ਅਧਿਕਾਰੀ ਨੇ ਦੱਸਿਆ,”ਮਸੀਹ ਉਦੋਂ ਜ਼ਖਮੀ ਹੋ ਗਿਆ ਜਦੋਂ ਰੱਬਾਨੀ ਨੇ ਉਸ ‘ਤੇ ਇੱਟ ਸੁੱਟੀ, ਜੋ ਉਸਦੇ ਸਿਰ ਵਿੱਚ ਲੱਗੀ।”
ਮਸੀਹ ਨੂੰ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸਦੀ ਹਾਲਤ ਸਥਿਰ ਹੈ। ਪੁਲਿਸ ਨੇ ਮੁੱਖ ਸ਼ੱਕੀ ਰੱਬਾਨੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਅਤੇ ਉਸਦੇ ਅਤੇ 15 ਹੋਰਾਂ ਵਿਰੁੱਧ ਕੇਸ ਦਰਜ ਕਰ ਲਿਆ ਹੈ। ਇੱਕ ਐਨ.ਜੀ.ਓ ਵੌਇਸ ਆਫ਼ ਪਾਕਿਸਤਾਨ ਮਾਈਨੋਰਿਟੀ ਨੇ ਇੱਕ ਬਿਆਨ ਵਿੱਚ ਕਿਹਾ,”ਇੱਕ ਈਸਾਈ ਵਿਅਕਤੀ, ਜੋ ਆਪਣੀ ਰੋਜ਼ਾਨਾ ਦੀ ਮਿਹਨਤ ਨਾਲ ਮੁਸ਼ਕਿਲ ਨਾਲ ਗੁਜ਼ਾਰਾ ਕਰ ਰਿਹਾ ਸੀ, ਦੇ ਸਿਰ ‘ਤੇ ਇੱਟ ਨਾਲ ਵਾਰ ਕੀਤਾ ਗਿਆ। ਇਹ ਹਮਲਾ ਗਲਤ ਕੰਮ ਕਰਨ ਲਈ ਨਹੀਂ, ਸਗੋਂ ਨਾਂਹ ਕਹਿਣ ਦੀ ਹਿੰਮਤ ਕਰਨ ਲਈ ਕੀਤਾ ਗਿਆ।
