ਸਾਊਦੀ ਅਰਬ ਨੇ ਕਰ’ਤੀ Airstrike! ਹੂਤੀ ਵਿਦਰੋਹੀਆਂ ਦਾ ਵੱਡਾ ਦਾਅਵਾ

ਬੇਰੂਤ ਸਾਊਦੀ ਅਰਬ ਨੇ ਯਮਨ ‘ਤੇ ਏਅਰਸਟ੍ਰਾਈਕ ਕੀਤੀ ਹੈ। ਯਮਨ ‘ਤੇ ਉੱਤਰੀ ਹਿੱਸੇ ‘ਤੇ ਸ਼ਾਸਨ ਕਰਨ ਵਾਲੀ ਅੰਸਾਰ ਅੱਲ੍ਹਾ ਲਹਿਰ (ਜਿਸਨੂੰ ਹੂਤੀ ਵੀ ਕਿਹਾ ਜਾਂਦਾ ਹੈ), ਨੇ ਸਾਊਦੀ ਅਰਬ ‘ਤੇ ਦੋਸ਼ ਲਗਾਇਆ ਹੈ ਕਿ ਉਸ ਨੇ ਪਿਛਲੇ 24 ਘੰਟਿਆਂ ਵਿੱਚ ਉਨ੍ਹਾਂ ਦੇ ਖੇਤਰ ਵਿੱਚ 106 ਹਵਾਈ ਹਮਲੇ ਕੀਤੇ ਹਨ। ਹੂਤੀ ਵਿਦਰੋਹੀਆਂ ਦੇ ਫੌਜੀ ਬੁਲਾਰੇ ਯਾਹੀਆ ਸਾਰੀ ਨੇ ਟੈਲੀਗ੍ਰਾਮ ‘ਤੇ ਲਿਖਿਆ, “ਪਿਛਲੇ 24 ਘੰਟਿਆਂ ਵਿੱਚ, ਸਾਊਦੀ ਜੰਗੀ ਜਹਾਜ਼ਾਂ ਨੇ ਰਾਜਧਾਨੀ ਸਨਾ ਅਤੇ ਅਲ-ਜੌਫ, ਤਾਈਜ਼, ਅਮਰਾਨ, ਹੱਜਾ ਅਤੇ ਸਾਦਾ ਪ੍ਰਾਂਤਾਂ ਵਿੱਚ ਨਾਗਰਿਕ ਟੀਚਿਆਂ ‘ਤੇ 106 ਹਵਾਈ ਅਤੇ ਮਿਜ਼ਾਈਲ ਹਮਲੇ ਕੀਤੇ ਹਨ।”
ਸਾਰੀ ਨੇ ਅੱਗੇ ਕਿਹਾ ਕਿ ਐਫ-15 ਅਤੇ ਟਾਈਫੂਨ ਲੜਾਕੂ ਜਹਾਜ਼ਾਂ ਨੇ ਯਮਨ ਦੇ ਉਨ੍ਹਾਂ ਇਲਾਕਿਆਂ ‘ਤੇ ਹਮਲੇ ਕੀਤੇ ਹਨ ਜੋ ਹੂਤੀ ਵਿਦਰੋਹੀਆਂ ਦੇ ਕੰਟਰੋਲ ਹੇਠ ਹਨ। ਸਾਰੀਆ ਅਨੁਸਾਰ ਇਨ੍ਹਾਂ ਤਾਜ਼ਾ ਹਮਲਿਆਂ ਨਾਲ ਮੌਜੂਦਾ ਤਣਾਅ ਸ਼ੁਰੂ ਹੋਣ ਤੋਂ ਬਾਅਦ ਸਾਊਦੀ ਅਰਬ ਦੁਆਰਾ ਕੀਤੇ ਗਏ ਹਵਾਈ ਅਤੇ ਮਿਜ਼ਾਈਲ ਹਮਲਿਆਂ ਦੀ ਕੁੱਲ ਗਿਣਤੀ ਵਧ ਕੇ 1,516 ਹੋ ਗਈ ਹੈ। ਹਾਲਾਂਕਿ, ਇਨ੍ਹਾਂ ਅੰਕੜਿਆਂ ਦੀ ਸੁਤੰਤਰ ਤੌਰ ‘ਤੇ ਪੁਸ਼ਟੀ ਨਹੀਂ ਹੋ ਸਕੀ ਹੈ ਅਤੇ ਨਾ ਹੀ ਸਾਊਦੀ ਅਰਬ ਨੇ ਇਨ੍ਹਾਂ ਹਮਲਿਆਂ ਦੀ ਪੁਸ਼ਟੀ ਕੀਤੀ ਹੈ।ਇਸ ਤੋਂ ਪਹਿਲਾਂ ਐਤਵਾਰ ਨੂੰ ਯਮਨ ਦੀ ਅੰਤਰਰਾਸ਼ਟਰੀ ਪੱਧਰ ‘ਤੇ ਮਾਨਤਾ ਪ੍ਰਾਪਤ ਸਰਕਾਰ ਦੀਆਂ ਫੌਜਾਂ ਨੇ ਉਨ੍ਹਾਂ ਖੇਤਰਾਂ ਨੂੰ ਮੁੜ ਹਾਸਲ ਕਰਨ ਲਈ ਇੱਕ ਫੌਜੀ ਕਾਰਵਾਈ ਦਾ ਐਲਾਨ ਕੀਤਾ ਜੋ ਇਸ ਸਮੇਂ ਸਰਕਾਰੀ ਨਿਯੰਤਰਣ ਤੋਂ ਬਾਹਰ ਹਨ।
ਹੂਤੀ ਸਮੂਹ ਦਾ ਇਹ ਬਿਆਨ ਯਮਨ ਸਰਕਾਰ ਦੁਆਰਾ ਹੂਤੀ-ਕਬਜ਼ੇ ਵਾਲੇ ਖੇਤਰਾਂ ਨੂੰ ਮੁਕਤ ਕਰਵਾਉਣ ਲਈ ‘ਮੁਕਤੀ ਸੰਗ੍ਰਾਮ’ ਦੇ ਆਗਾਜ਼ ਦੇ ਐਲਾਨ ਤੋਂ ਕੁਝ ਘੰਟੇ ਬਾਅਦ ਆਇਆ ਹੈ। ਯਮਨ ਵਿੱਚ ਸਾਲਾਂ ਬਾਅਦ ਸਭ ਤੋਂ ਤਿੱਖਾ ਤਣਾਅ ਦੇਖਣ ਨੂੰ ਮਿਲ ਰਿਹਾ ਹੈ, ਜਿੱਥੇ ਦੱਖਣ-ਪੱਛਮੀ ਯਮਨ ਵਿੱਚ ਭਾਰੀ ਜੰਗ ਫੈਲ ਗਈ ਹੈ ਅਤੇ ਹੂਤੀਆਂ ਤੇ ਸਾਊਦੀ ਅਰਬ ਵਿਚਕਾਰ ਸਿੱਧੀਆਂ ਝੜਪਾਂ ਮੁੜ ਸ਼ੁਰੂ ਹੋ ਗਈਆਂ ਹਨ। ਯਮਨ ਵਿੱਚ ਇਹ ਸੰਘਰਸ਼ 2014 ਦੇ ਅਖੀਰ ਵਿੱਚ ਸ਼ੁਰੂ ਹੋਇਆ ਸੀ, ਜਦੋਂ ਹੂਤੀਆਂ ਨੇ ਰਾਜਧਾਨੀ ਸਾਨਾ ਅਤੇ ਉੱਤਰੀ ਯਮਨ ਦੇ ਇੱਕ ਵੱਡੇ ਹਿੱਸੇ ‘ਤੇ ਕਬਜ਼ਾ ਕਰ ਲਿਆ ਸੀ। ਇਸ ਤੋਂ ਬਾਅਦ ਯਮਨ ਦੀ ਅੰਤਰਰਾਸ਼ਟਰੀ ਮਾਨਤਾ ਪ੍ਰਾਪਤ ਸਰਕਾਰ ਦੇ ਸਮਰਥਨ ਵਿੱਚ ਸਾਊਦੀ ਅਗਵਾਈ ਵਾਲੇ ਗੱਠਜੋੜ ਨੇ ਮਾਰਚ 2015 ਵਿੱਚ ਫੌਜੀ ਦਖਲਅੰਦਾਜ਼ੀ ਕੀਤੀ ਸੀ।