ਨਵੀਂ ਦਿੱਲੀ – ਭਾਰਤੀ ਕ੍ਰਿਕਟ ਟੀਮ ਦੇ ਨਾਲ ਆਸਟਰੇਲੀਆ ਦੌਰੇ ‘ਤੇ ਗਏ ਤੇਜ਼ ਗੇਂਦਬਾਜ਼ ਇਸ਼ਾਨ ਪੋਰੇਲ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਹੈ। ਜਾਣਕਾਰੀ ਅਨੁਸਾਰ, ਤੀਜੇ ਵਨ ਡੇਅ ਤੋਂ ਪਹਿਲਾਂ ਭਾਰਤੀ ਟੀਮ ਦੇ ਬੱਲੇਬਾਜ਼ਾਂ ਨਾਲ ਅਭਿਆਸ ਕਰ ਰਿਹਾ ਇਸ਼ਾਨ ਜ਼ਖ਼ਮੀ ਹੋ ਗਿਆ, ਅਤੇ ਹੁਣ ਉਹ ਭਾਰਤ ਵਾਪਿਸ ਆ ਗਿਆ ਹੈ। ਬੰਗਾਲ ਦੇ ਤੇਜ਼ ਗੇਂਦਬਾਜ਼ ਇਸ਼ਾਨ ਪੋਰੇਲ ਨੂੰ ਨੈੱਟ ਸੈਸ਼ਨ ਦੌਰਾਨ ਪੈਰ ਦੀਆਂ ਮਾਂਸਪੇਸ਼ੀਆਂ ‘ਚ ਸੱਟ ਲੱਗੀ ਅਤੇ ਬਾਅਦ ‘ਚ ਆਸਟਰੇਲੀਆ ਦੌਰੇ ਤੋਂ ਵਾਪਿਸ ਭੇਜ ਦਿੱਤਾ ਗਿਆ।
ਭਾਰਤੀ ਕ੍ਰਿਕਟ ਬੋਰਡ (BCCI) ਦੇ ਇੱਕ ਸੂਤਰ ਨੇ ਨਾ ਦੱਸਣ ਦੀ ਸ਼ਰਤ ‘ਤੇ ਇਸ ਗੱਲ ਨੂੰ ਸ਼ੇਅਰ ਕੀਤਾ। ਇਸ਼ਾਨ ਪੋਰੇਲ ਦੀ ਪੈਰ ਦੀਆਂ ਮਾਂਸਪੇਸ਼ੀਆਂ ‘ਚ ਸੱਟ ਲੱਗੀ ਹੈ, ਅਤੇ ਉਹ ਭਾਰਤ ਜਾ ਚੁੱਕਿਆ ਹੈ। ਆਸਟਰੇਲੀਆ ਦੌਰੇ ‘ਤੇ ਗਈ ਭਾਰਤੀ ਟੀਮ ਦੇ ਨਾਲ ਚੋਣਕਰਤਾਵਾਂ ਨੇ ਤਿੰਨ ਗੇਂਦਬਾਜ਼ਾਂ ਨੂੰ ਨੈੱਟ ‘ਚ ਗੇਂਦਬਾਜ਼ੀ ਕਰਨ ਲਈ ਭੇਜਿਆ ਸੀ। ਟੀ ਨਟਰਾਜਨ, ਕਾਰਤਿਕ ਤਿਆਗੀ ਅਤੇ ਇਸ਼ਾਨ ਪੋਰੇਲ। ਕਮਲੇਸ਼ ਨਾਗਰਕੋਟੀ ਨੇ ਆਖ਼ਰੀ ਸਮੇਂ ‘ਤੇ ਦੌਰੇ ਤੋਂ ਆਪਣਾ ਨਾਂ ਵਾਪਿਸ ਲੈ ਲਿਆ ਸੀ। ਆਸਟਰੇਲੀਆ ਦੌਰੇ ‘ਤੇ ਖਾਣਾ ਖਾਣ ਤੋਂ ਪਹਿਲਾਂ ਇਸ਼ਾਨ ਨੇ ਟੀਮ ਦੇ ਬਾਕੀ ਖਿਡਾਰੀਆਂ ਨਾਲ ਆਪਣੀ ਇੱਕ ਤਸਵੀਰ ਵੀ ਸ਼ੇਅਰ ਕੀਤੀ ਸੀ। ਇਸ ਤਸਵੀਰ ‘ਚ ਉਸ ਨਾਲ ਵਿਕਟਕੀਪਰ ਬੱਲੇਬਾਜ਼ ਰਿਧੀਮਾਨ ਸਾਹਾ ਅਤੇ ਗੇਂਦਬਾਜ਼ ਉਮੇਸ਼ ਯਾਦਵ ਨਜ਼ਰ ਆ ਰਿਹਾ ਹੈ।
