ਕਰਾਚੀ : ਪਾਕਿਸਤਾਨ ਦੇ ਬਲੋਚਿਸਤਾਨ ਸੂਬੇ ਵਿੱਚ ਮਕਰਾਨ ਕੋਸਟਲ ਹਾਈਵੇਅ ‘ਤੇ ਇੱਕ ਯਾਤਰੀ ਬੱਸ ਅਤੇ ਐੱਲਪੀਜੀ (LPG) ਟੈਂਕਰ ਵਿਚਕਾਰ ਭਿਆਨਕ ਟੱਕਰ ਹੋ ਗਈ, ਜਿਸ ਵਿੱਚ 10 ਲੋਕਾਂ ਦੀ ਮੌਤ ਹੋ ਗਈ ਅਤੇ 27 ਹੋਰ ਜ਼ਖ਼ਮੀ ਹੋ ਗਏ। ਰਿਪੋਰਟਾਂ ਅਨੁਸਾਰ, ਟੱਕਰ ਹੁੰਦੇ ਹੀ ਦੋਵਾਂ ਵਾਹਨਾਂ ਨੂੰ ਅੱਗ ਲੱਗ ਗਈ, ਜਿਸ ਕਾਰਨ ਕਈ ਯਾਤਰੀ ਬੱਸ ਦੇ ਅੰਦਰ ਹੀ ਫਸ ਗਏ।
‘ਡਾਨ’ (Dawn) ਅਖ਼ਬਾਰ ਦੀ ਰਿਪੋਰਟ ਮੁਤਾਬਕ, ਇਹ ਹਾਦਸਾ ਵੀਰਵਾਰ ਸ਼ਾਮ ਕਰੀਬ 4:30 ਵਜੇ ਗਵਾਦਰ ਜ਼ਿਲ੍ਹੇ ਦੇ ਓਰਮਾਰਾ ਇਲਾਕੇ ਵਿੱਚ ਬਸੋਲ ਨੇੜੇ ਵਾਪਰਿਆ, ਜੋ ਕਿ ਕੋਸਟਲ ਹਾਈਵੇਅ ‘ਤੇ ਸਥਿਤ ਪੁਲਸ ਚੌਕੀ ਦੇ ਨੇੜੇ ਹੈ। ਤੁਰਬਤ ਤੋਂ ਕਰਾਚੀ ਜਾ ਰਹੀ ਇੱਕ ਨਿੱਜੀ ਯਾਤਰੀ ਬੱਸ ਦੀ ਟੱਕਰ, ਕਰਾਚੀ ਤੋਂ ਗਵਾਦਰ ਦੇ ਨੇੜੇ ਈਰਾਨ-ਗਾਬਦ ਸਰਹੱਦ ਵੱਲ ਜਾ ਰਹੇ ਇੱਕ ਐੱਲਪੀਜੀ ਟੈਂਕਰ ਨਾਲ ਆਹਮੋ-ਸਾਹਮਣੇ ਹੋ ਗਈ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਦੋਵੇਂ ਵਾਹਨ ਤੁਰੰਤ ਅੱਗ ਦੀ ਲਪੇਟ ਵਿੱਚ ਆ ਗਏ।
ਬੱਸ ‘ਚ ਸਵਾਰ ਸਨ 40 ਯਾਤਰੀ
ਬੱਸ ਵਿੱਚ 40 ਤੋਂ ਵੱਧ ਯਾਤਰੀ ਸਵਾਰ ਸਨ, ਜਿਨ੍ਹਾਂ ਵਿੱਚ ਔਰਤਾਂ ਅਤੇ ਬੱਚੇ ਵੀ ਸ਼ਾਮਲ ਸਨ। ਕਈ ਲੋਕ ਭਿਆਨਕ ਅੱਗ ਵਿੱਚ ਫਸ ਗਏ। ਓਰਮਾਰਾ ਦੇ ਡੀਐੱਸਪੀ ਨਬੀ ਬਖਸ਼ ਰੁੰਝਾ ਅਨੁਸਾਰ, ਸਾਰੇ 10 ਪੀੜਤ, ਜਿਨ੍ਹਾਂ ਵਿੱਚ ਔਰਤਾਂ ਅਤੇ ਬੱਚੇ ਵੀ ਸ਼ਾਮਲ ਹਨ, ਗੰਭੀਰ ਰੂਪ ਵਿੱਚ ਸੜਨ ਕਾਰਨ ਮਾਰੇ ਗਏ। 8 ਲਾਸ਼ਾਂ ਯਾਤਰੀ ਬੱਸ ਵਿੱਚੋਂ ਅਤੇ 2 ਲਾਸ਼ਾਂ ਗੈਸ ਟੈਂਕਰ ਵਿੱਚੋਂ ਬਰਾਮਦ ਕੀਤੀਆਂ ਗਈਆਂ।
ਕਈ ਘੰਟਿਆਂ ਤੱਕ ਆਵਾਜਾਈ ਰਹੀ ਪ੍ਰਭਾਵਿਤ
ਪਾਕਿਸਤਾਨੀ ਫੌਜ, ਪੁਲਸ ਅਤੇ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਨੇ ਅੱਗ ਬੁਝਾਉਣ ਅਤੇ ਬਚਾਅ ਕਾਰਜ ਚਲਾਉਣ ਲਈ ਸਾਂਝਾ ਅਭਿਆਨ ਸ਼ੁਰੂ ਕੀਤਾ। ਇਸ ਹਾਦਸੇ ਕਾਰਨ ਹਾਈਵੇਅ ‘ਤੇ ਕਈ ਘੰਟਿਆਂ ਤੱਕ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਰਹੀ, ਜਿਸ ਕਾਰਨ ਵਾਹਨਾਂ ਦੀਆਂ ਲੰਬੀਆਂ ਕਤਾਰਾਂ ਲੱਗ ਗਈਆਂ।















