ਹਿਮਾਚਲ ਪ੍ਰਦੇਸ਼- ਬਾਲੀਵੁੱਡ ਅਦਾਕਾਰਾ ਅਤੇ ਹੁਣ ਮੰਡੀ, ਹਿਮਾਚਲ ਪ੍ਰਦੇਸ਼ ਤੋਂ ਬੀਜੇਪੀ ਸੰਸਦ ਕੰਗਨਾ ਰਣੌਤ ਇੱਕ ਵਾਰ ਫਿਰ ਸੁਰਖੀਆਂ ‘ਚ ਹੈ। ਇਸ ਵਾਰ ਕਾਰਨ ਹੈ ਉਸ ਦਾ ਵਿਆਹ! ਉਸ ਨੇ ਹਾਲ ਹੀ ‘ਚ ਇਸ ‘ਤੇ ਆਪਣੀ ਚੁੱਪੀ ਤੋੜੀ ਹੈ ਅਤੇ ਦੱਸਿਆ ਹੈ ਕਿ ਉਹ ਕਦੋਂ ਵਿਆਹ ਕਰੇਗੀ। ਦੱਸਣਯੋਗ ਹੈ ਕਿ 38 ਸਾਲਾ ਕੰਗਨਾ ਤੋਂ ਅਕਸਰ ਉਸ ਦੇ ਵਿਆਹ ਨੂੰ ਲੈ ਕੇ ਸਵਾਲ ਪੁੱਛੇ ਜਾਂਦੇ ਹਨ। ਦਰਅਸਲ, ਜਦੋਂ ਤੋਂ ਉਹ ਸਾਂਸਦ ਬਣੀ ਹੈ, ਉਸ ਦਾ ਨਾਂ ਲੋਜਪਾ (ਆਰ) ਦੇ ਪ੍ਰਧਾਨ ਚਿਰਾਗ ਪਾਸਵਾਨ ਨਾਲ ਜੋੜਿਆ ਗਿਆ ਹੈ। ਦੋਵਾਂ ਨੇ ਇੱਕ ਫਿਲਮ ‘ਚ ਇਕੱਠੇ ਕੰਮ ਵੀ ਕੀਤਾ ਹੈ ਅਤੇ ਜਦੋਂ ਉਹ ਸੰਸਦ ਭਵਨ ‘ਚ ਮਿਲੇ ਸਨ ਤਾਂ ਹਰ ਪਾਸੇ ਉਨ੍ਹਾਂ ਦੀ ਤਸਵੀਰ ਸੀ।
ਕੰਗਨਾ ਰਣੌਤ ਨੇ ਨਿੱਜੀ ਚੈਨਲ ਨੂੰ ਦਿੱਤੇ ਇੰਟਰਵਿਊ ‘ਚ ਆਪਣੇ ਵਿਆਹ ਦੇ ਸਵਾਲ ਦਾ ਜਵਾਬ ਦਿੱਤਾ। ਉਸ ਨੇ ਕਿਹਾ ਕਿ ਉਹ ਵਿਆਹ ਕਰਨਾ ਚਾਹੁੰਦੀ ਹੈ। ਜਦੋਂ ਉਸ ਨੂੰ ਪੁੱਛਿਆ ਗਿਆ ਕਿ ਕੀ ਉਹ ਇਸ ਕਾਰਜਕਾਲ ਦੌਰਾਨ ਸੱਤ ਫੇਰੇ ਲੈ ਸਕਦੀ ਹੈ, ਤਾਂ ਉਸ ਨੇ ਹੱਸਦਿਆਂ ਕਿਹਾ ਕਿ ਉਮੀਦ ਹੈ, ਕਿਉਂਕਿ ਇਸ ਤੋਂ ਬਾਅਦ ਵਿਆਹ ਕਰਨ ਦਾ ਕੋਈ ਮਤਲਬ ਨਹੀਂ ਹੈ।
