ਸਮੂਹਿਕ ਜਬਰ-ਜ਼ਨਾਹ ਪੀੜਤਾ ਨੂੰ 26 ਹਫਤਿਆਂ ਦਾ ਗਰਭ ਡੇਗਣ ਦੀ ਮਿਲੀ ਇਜਾਜ਼ਤ

ਗੁਹਾਟੀ – ਗੁਹਾਟੀ ਹਾਈ ਕੋਰਟ ਨੇ ਆਸਾਮ ਦੇ ਤਿਨਸੁਕੀਆ ਦੀ ਸਮੂਹਿਕ ਜਬਰ-ਜ਼ਨਾਹ ਪੀੜਤਾ 15 ਸਾਲਾ ਇਕ ਨਾਬਾਲਗਾ ਨੂੰ ਉਸ ਦੇ ‘ਸਰਬੋਤਮ ਹਿੱਤ ’ਚ 26 ਹਫ਼ਤਿਆਂ ਦੇ ਗਰਭ ਨੂੰ ਡੇਗਣ ਦੀ ਇਜਾਜ਼ਤ ਦੇ ਦਿੱਤੀ ਹੈ। ਮੀਡੀਆ ਦੀ ਖਬਰ ਦਾ ਨੋਟਿਸ ਲੈਂਦਿਆਂ ਜਸਟਿਸ ਕਲਿਆਣ ਰਾਏ ਸੁਰਾਨਾ ਅਤੇ ਜਸਟਿਸ ਸੁਸ਼ਮਿਤਾ ਫੂਕਨ ਖਾਂਡ ਦੀ ਬੈਂਚ ਨੇ ਸੋਮਵਾਰ ਨੂੰ ਸੂਬਾ ਸਰਕਾਰ ਨੂੰ ਅਣਚਾਹੇ ਭਰੂਣ ਦਾ ‘ਮੈਡੀਕਲੀ ਤੌਰ ’ਤੇ ਗਰਭਪਾਤ ਕਰਨ’ ਅਤੇ 19 ਦਸੰਬਰ ਤੱਕ ਸਥਿਤੀ ਦੀ ਰਿਪੋਰਟ ਪੇਸ਼ ਕਰਨ ਦਾ ਨਿਰਦੇਸ਼ ਦਿੱਤਾ।
ਮੈਡੀਕਲ ਗਰਭਪਾਤ ਐਕਟ, 1971 (ਐੱਮ. ਡੀ. ਪੀ. ਏ.) ਮੁਤਾਬਕ 24 ਹਫ਼ਤਿਆਂ ਤੋਂ ਵੱਧ ਦੇ ਗਰਭ ਨੂੰ ਡੇਗਣ ਦੀ ਇਜਾਜ਼ਤ ਨਹੀਂ ਹੈ। 29 ਨਵੰਬਰ ਨੂੰ ਛਪੀ ਖ਼ਬਰ ਮੁਤਾਬਕ ਪੀੜਤਾ ਜਦੋਂ ਸਿਰਫ਼ 14 ਸਾਲਾਂ ਦੀ ਸੀ ਤਾਂ ਤਿਨਸੁਕੀਆ ’ਚ 4 ਨਾਬਾਲਗਾਂ ਸਮੇਤ 7 ਲੋਕਾਂ ਨੇ ਉਸ ਨਾਲ ਸਮੂਹਿਕ ਜਬਰ-ਜ਼ਨਾਹ ਕੀਤਾ ਸੀ।