ਕੋਰਟ ਨੇ ਦਿੱਲੀ ਪੁਲਸ ਤੋਂ ਪੁੱਛਿਆ- ‘ਹੁਣ ਤੱਕ ਕਿੰਨੇ ਗੈਰ-ਕਾਨੂੰਨੀ ਮਸਾਜ ਪਾਰਲਰ ਬੰਦ ਕੀਤੇ ਹਨ?’

ਨਵੀਂ ਦਿੱਲੀ— ਹਾਈ ਕੋਰਟ ਨੇ ਵੀਰਵਾਰ ਨੂੰ ਦਿੱਲੀ ਪੁਲਸ ਤੋਂ ਪੁੱਛਿਆ ਕਿ ਕੀ ਉਸ ਨੇ ਰਾਸ਼ਟਰੀ ਰਾਜਧਾਨੀ ‘ਚ ਕਿਸੇ ਗੈਰ-ਕਾਨੂੰਨੀ ਮਸਾਜ ਪਾਰਲਰ ਨੂੰ ਬੰਦ ਕੀਤਾ ਹੈ? ਮੁੱਖ ਜੱਜ ਡੀ.ਐੱਨ. ਪਟੇਲ ਅਤੇ ਜੱਜ ਸੀ. ਹਰਿਸ਼ੰਕਰ ਦੀ ਬੈਂਚ ਨੇ ਦਿੱਲੀ ਪੁਲਸ ਨੂੰ ਕਿਹਾ,”ਕੁਝ ਕਰੋ। ਕੁਝ ਕੰਮ ਕਰੋ। ਉਸ ਤੋਂ ਬਾਅਦ ਸਥਿਤੀ ਰਿਪੋਰਟ ਖਾਰਜ ਕਰੋ। ਨਹੀਂ ਤਾਂ ਕੌਣ ਤੁਹਾਡੀ ਰਿਪੋਰਟ ਨੂੰ ਪੜ੍ਹਨਾ ਚਾਹੇਗਾ।” ਬੈਂਚ ਨੇ ਇਕ ਜਨਹਿੱਤ ਪਟੀਸ਼ਨ ‘ਤੇ ਸੁਣਵਾਈ ਕਰਦੇ ਹੋਏ ਇਹ ਗੱਲ ਕਹੀ, ਜਿਸ ‘ਚ ਦੋਸ਼ ਲਗਾਇਆ ਗਿਆ ਹੈ ਕਿ ਮਸਾਜ ਪਾਰਲਰ ਦੀ ਆੜ ‘ਚ ਸੈਕਸ ਰੈਕੇਟ ਚੱਲ ਰਹੇ ਹਨ। ਬੈਂਚ ਨੇ ਇਹ ਟਿੱਪਣੀ ਪੁਲਸ ਵਲੋਂ ਦਾਖਲ ਹਾਲੀਆ ਰਿਪੋਰਟ ‘ਤੇ ਨਾਖੁਸ਼ੀ ਜ਼ਾਹਰ ਕਰਦੇ ਹੋਏ ਕੀਤੀ, ਜਿਸ ‘ਚ ਇਸ ਗੱਲ ਦਾ ਸੰਕੇਤ ਨਹੀਂ ਦਿੱਤਾ ਗਿਆ ਸੀ ਕਿ ਕੀ ਉਸ ਨੇ ਸ਼ਹਿਰ ‘ਚ ਚੱਲਣ ਵਾਲੇ ਕਿਸੇ ਵੀ ਗੈਰ-ਕਾਨੂੰਨੀ ਮਸਾਜ ਪਾਰਲਰ ਨੂੰ ਬੰਦ ਕੀਤਾ ਹੈ।
ਕੋਰਟ ਨੇ ਕਿਹਾ,”ਤੁਹਾਨੂੰ ਇਹ ਦੱਸਣਾ ਚਾਹੀਦਾ ਸੀ ਕਿ ਹੁਣ ਤੱਕ ਤੁਸੀਂ ਲਗਭਗ 3 ਦਰਜਨ ਇਸ ਤਰ੍ਹਾਂ ਦੇ ਮਸਾਜ ਪਾਰਲਰ ਬੰਦ ਕੀਤੇ ਹਨ ਅਤੇ ਅਜਿਹੇ ਕਾਰੋਬਾਰਾਂ ਦਾ ਪਾਣੀ ਅਤੇ ਬਿਜਲੀ ਦਾ ਕਨੈਕਸ਼ਨ ਕੱਟ ਦਿੱਤਾ ਗਿਆ ਹੈ। ਇੱਥੇ ਦਰਜਨਾਂ ਸਮਾਜ ਪਾਰਲਰ ਹੋਣੇ ਚਾਹੀਦੇ ਹਨ। ਕੀ ਤੁਸੀਂ ਇਕ ਵੀ ਉਦਾਹਰਣ ਦੇ ਸਕਦੇ ਹੋ ਕਿ ਤੁਸੀਂ ਕਿਸੇ ਮਸਾਜ ਪਾਰਲਰ ਨੂੰ ਬੰਦ ਕੀਤਾ ਹੈ? ਤੁਹਾਡੇ ਅਧਿਕਾਰੀ ਕਿੱਥੇ ਹਨ?” ਬੈਂਚ ਨੇ ਕਿਹਾ ਕਿ ਉਹ ਪੁਲਸ ਦਾ ਕੰਮ ਕਰਨ ਲਈ ਕਮੇਟੀਆਂ ਗਠਿਤ ਨਹੀਂ ਕਰ ਸਕਦੀ ਅਤੇ ਇਸ ਗੱਲ ਦੀ ਚਿਤਾਵਨੀ ਦਿੱਤੀ ਕਿ ਜੇਕਰ ਉਸ ਨੂੰ ਕਮੇਟੀ ਗਠਿਤ ਕਰਨੀ ਪਈ ਤਾਂ ਉਹ ਏਜੰਸੀ ਵਿਰੁੱਧ ਸਖਤ ਟਿੱਪਣੀ ਕਰ ਸਕਦੀ ਹੈ। ਬੈਂਚ ਨੇ ਪੁਲਸ ਨੂੰ ਸੁਣਵਾਈ ਦੀ ਅਗਲੀ ਤਾਰੀਕ 25 ਨਵੰਬਰ ਤੱਕ ਇਕ ਰਿਪੋਰਟ ਦਾਖਲ ਕਰਨ ਨੂੰ ਕਿਹਾ, ਜਿਸ ‘ਚ ਇਸ ਤਰ੍ਹਾਂ ਦੇ ਪਾਰਲਰ ਵਿਰੁੱਧ ਕੀਤੀ ਗਈ ਕਾਰਵਾਈ ਬਾਰੇ ਜਾਣਕਾਰੀ ਦੇਣ ਲਈ ਕਿਹਾ ਗਿਆ ਹੈ। ਪੀਠ ਨਗਰ ਦੇ ਰਹਿਣ ਵਾਲੇ ਅਤੀਤ ਬੰਸਲ ਦੀ ਪਟੀਸ਼ਨ ‘ਤੇ ਸੁਣਵਾਈ ਕਰ ਰਹੀ ਸੀ।