ਕੇਂਦਰੀ ਵਿੱਤ ਦੀ ਫਰਜ਼ੀ ਵੀਡੀਓ ਬਣਾ ਕੇ ਦਿੱਤਾ ਆਨਲਾਈਨ ਟਰੇਡਿੰਗ ਦਾ ਝਾਂਸਾ ! ਬੰਦੇ ਤੋਂ ਠੱਗ ਲਿਆ 1.4 ਕਰੋੜ

ਕੋਝੀਕੋਡ – ਕੇਰਲਮ ‘ਚ ਜਾਲਸਾਜ਼ਾਂ ਨੇ ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਦਾ ਫਰਜ਼ੀ ਵੀਡੀਓ ਦਿਖਾ ਕੇ ਆਨਲਾਈਨ ਟ੍ਰੇਡਿੰਗ ‘ਚ ਨਿਵੇਸ਼ ਦਾ ਝਾਂਸਾ ਦੇ ਕੇ 63 ਸਾਲਾ ਇਕ ਵਿਅਕਤੀ ਤੋਂ 1.41 ਕਰੋੜ ਰੁਪਏ ਠੱਗ ਗਏ। ਕੋਝੀਕੋਡ ਗ੍ਰਾਮੀਣ ਸਾਈਬਰ ਅਪਰਾਧ ਪੁਲਸ ਨੇ ਸ਼ਨੀਵਾਰ ਨੂੰ ਨਾਦੂਵੰਨੂਰ ਦੇ ਨੋਚਾਡ ਦੇ ਨਿਵਾਸੀ ਅਬਦੁਰਹਿਮਾਨ ਪੀ. ਦੀ ਸ਼ਿਕਾਇਤ ਦੇ ਆਧਾਰ ‘ਤੇ ਇਸ ਮਾਮਲੇ ‘ਚ ਐੱਫਆਈਆਰ ਦਰਜ ਕੀਤੀ। ਪੁਲਸ ਦੇ ਅਨੁਸਾਰ, ਸ਼ਿਕਾਇਤਕਰਤਾ ਨੇ ਫੇਸਬੁੱਕ ‘ਤੇ ਇਕ ਵੀਡੀਓ ਦੇਖਿਆ ਸੀ ਜਿਸ ‘ਚ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਆਨਲਾਈਨ ਵਪਾਰ (ਟ੍ਰੇਡਿੰਗ) ਰਾਹੀਂ ਆਕਰਸ਼ਕ ਲਾਭ ਮਿਲਣ ਦਾ ਭਰੋਸਾ ਦਿੰਦੀ ਨਜ਼ਰ ਆ ਰਹੀ ਸੀ।
ਪੁਲਸ ਨੇ ਕਿਹਾ ਕਿ ਵੀਡੀਓ ਨੂੰ ਅਸਲੀ ਮੰਨ ਕੇ ਸ਼ਿਕਾਇਤਕਰਤਾ ਨੇ ਉਸ ਨਾਲ ਦਿੱਤੇ ਗਏ ਲਿੰਕ ‘ਤੇ ਕਲਿੱਕ ਕੀਤਾ ਅਤੇ ਠੱਗਾਂ ਦੇ ਨਿਰਦੇਸ਼ਾਂ ਦੀ ਪਾਲਣਾ ਕੀਤੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਕਥਿਤ ਧੋਖਾਧੜੀ 6 ਜੂਨ 2025 ਤੋਂ 4 ਨਵੰਬਰ 2026 ਦੇ ਵਿਚਕਾਰ ਹੋਈ ਸੀ। ਉਨ੍ਹਾਂ ਦੱਸਿਆ ਕਿ ਇਸ ਸਮੇਂ ਦੌਰਾਨ ਪੀੜਤ ਨੇ ਆਪਣੇ 2 ਬੈਂਕ ਖਾਤਿਆਂ ਤੋਂ 30 ਵੱਖ-ਵੱਖ ਲੈਣ-ਦੇਣ ਰਾਹੀਂ ਕੁੱਲ 1.41 ਕਰੋੜ ਰੁਪਏ ਦੇ ਦੋਸ਼ੀ ਦੇ ਵੱਖ-ਵੱਖ ਬੈਂਕ ਖਾਤਿਆਂ ‘ਚ ਟ੍ਰਾਂਸਫਰ ਕੀਤੇ। ਅਧਿਕਾਰੀਆਂ ਦੇ ਅਨੁਸਾਰ, ਪੀੜਤ ਨੂੰ ਨਾ ਤਾਂ ਵਾਅਦਾ ਕੀਤਾ ਗਿਆ ਮੁਨਾਫਾ ਮਿਲਿਆ ਅਤੇ ਨਾ ਹੀ ਉਸ ਦਾ ਨਿਵੇਸ਼ ਕੀਤਾ ਗਿਆ ਪੈਸਾ ਵਾਪਸ ਕੀਤਾ ਗਿਆ, ਜਿਸ ਤੋਂ ਬਾਅਦ ਉਸ ਨੇ ਪੁਲਸ ਨਾਲ ਸੰਪਰਕ ਕੀਤਾ।
ਪੁਲਸ ਨੇ ਦੱਸਿਆ ਕਿ ਪੀੜਤ ਨੇ ਸ਼ੁਰੂ ‘ਚ ਇਸ ਉਮੀਦ ‘ਚ ਸ਼ਿਕਾਇਤ ਦਰਜ ਕਰਾਉਣ ‘ਚ ਦੇਰੀ ਕੀਤੀ ਕਿ ਉਸ ਨੂੰ ਉਸਦੇ ਗੁਆਚੇ ਹੋਏ ਪੈਸੇ ਵਾਪਸ ਮਿਲ ਜਾਣਗੇ। ਸਾਈਬਰ ਕ੍ਰਾਈਮ ਪੁਲਸ ਨੇ ਭਾਰਤੀ ਨਿਆਂ ਸੰਹਿਤਾ ਦੀ ਧਾਰਾ 318(4) ਅਤੇ ਸੂਚਨਾ ਤਕਨਾਲੋਜੀ ਐਕਟ ਦੀ ਧਾਰਾ 66D ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ, ਹਾਲਾਂਕਿ ਦੋਸ਼ੀਆਂ ਦੀ ਅਜੇ ਤੱਕ ਪਛਾਣ ਨਹੀਂ ਹੋ ਸਕੀ ਹੈ। ਪੁਲਸ ਨੇ ਕਿਹਾ ਕਿ ਪੀੜਤ ਦੁਆਰਾ ਵੱਖ-ਵੱਖ ਬੈਂਕ ਖਾਤਿਆਂ ‘ਚ ਟ੍ਰਾਂਸਫਰ ਕੀਤੀਆਂ ਗਈਆਂ ਰਕਮਾਂ ਅਤੇ ਉਸ ਨੂੰ ਕੀਤੇ ਗਏ ਫੋਨ ਕਾਲਾਂ ਦੇ ਆਧਾਰ ‘ਤੇ ਦੋਸ਼ੀ ਦਾ ਪਤਾ ਲਗਾਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ।