TikTok ਦੀ ਹੋਈ ਵਾਪਸੀ ! ਚੀਨੀ ਕੰਪਨੀ ਨੇ ਅਮਰੀਕੀ ਦਿੱਗਜਾਂ ਨਾਲ ਮਿਲਾਇਆ ਹੱਥ

ਵਾਸ਼ਿੰਗਟਨ – ਕਰੋੜਾਂ TikTok ਵਰਤੋਂਕਾਰਾਂ ਲਈ ਰਾਹਤ ਦੀ ਖ਼ਬਰ ਹੈ। ਅਮਰੀਕਾ ਵਿੱਚ TikTok ‘ਤੇ ਲੱਗਣ ਵਾਲੀ ਪਾਬੰਦੀ ਦਾ ਖ਼ਤਰਾ ਹੁਣ ਟਲ ਗਿਆ ਹੈ। TikTok ਨੇ ਇੱਕ ਨਵੀਂ ਅਮਰੀਕੀ ਇਕਾਈ (Entity) ਬਣਾਉਣ ਲਈ ਵੱਡਾ ਸੌਦਾ ਫਾਈਨਲ ਕਰ ਲਿਆ ਹੈ। ਇਸ ਨਵੇਂ ਸਮਝੌਤੇ ਤਹਿਤ TikTok ਹੁਣ ਅਮਰੀਕੀ ਨਿਵੇਸ਼ਕਾਂ ਨਾਲ ਮਿਲ ਕੇ ਕੰਮ ਕਰੇਗਾ, ਜਿਸ ਨਾਲ 20 ਕਰੋੜ ਤੋਂ ਵੱਧ ਅਮਰੀਕੀ ਵਰਤੋਂਕਾਰ ਬਿਨਾਂ ਕਿਸੇ ਰੁਕਾਵਟ ਦੇ ਇਸ ਐਪ ਦੀ ਵਰਤੋਂ ਕਰ ਸਕਣਗੇ।
ਟਰੰਪ ਨੇ ਸ਼ੀ ਜਿਨਪਿੰਗ ਦਾ ਕੀਤਾ ਧੰਨਵਾਦ
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਸਮਝੌਤੇ ਦੀ ਸ਼ਲਾਘਾ ਕਰਦਿਆਂ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਟਰੁੱਥ ਸੋਸ਼ਲ’ ‘ਤੇ ਇੱਕ ਪੋਸਟ ਸਾਂਝੀ ਕੀਤੀ ਹੈ। ਟਰੰਪ ਨੇ ਚੀਨੀ ਨੇਤਾ ਸ਼ੀ ਜਿਨਪਿੰਗ ਦਾ ਵਿਸ਼ੇਸ਼ ਤੌਰ ‘ਤੇ ਧੰਨਵਾਦ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੇ ਇਸ ਸਮਝੌਤੇ ਨੂੰ ਪ੍ਰਵਾਨਗੀ ਦੇਣ ਲਈ ਅਮਰੀਕਾ ਨਾਲ ਮਿਲ ਕੇ ਕੰਮ ਕੀਤਾ ਹੈ। ਟਰੰਪ ਨੇ ਉਮੀਦ ਜਤਾਈ ਕਿ ਟਿੱਕਟੌਕ ਦੀ ਵਰਤੋਂ ਕਰਨ ਵਾਲੇ ਲੋਕ ਭਵਿੱਖ ਵਿੱਚ ਉਨ੍ਹਾਂ ਨੂੰ ਇਸ ਕਦਮ ਲਈ ਯਾਦ ਰੱਖਣਗੇ।
ਨਵੀਂ ਕੰਪਨੀ ਦਾ ਸਰੂਪ ਅਤੇ ਨਿਵੇਸ਼ਕ
ਟਿੱਕਟੌਕ ਨੇ ਇਸ ਨਵੇਂ ‘ਟਿੱਕਟੌਕ ਯੂ.ਐੱਸ.’ ਸਾਂਝੇ ਉੱਦਮ ਲਈ ਓਰੇਕਲ , ਸਿਲਵਰ ਲੇਕ ਅਤੇ ਸੰਯੁਕਤ ਅਰਬ ਅਮੀਰਾਤ ਦੀ ਨਿਵੇਸ਼ ਫਰਮ MGX ਨਾਲ ਸਮਝੌਤੇ ਕੀਤੇ ਹਨ। ਇਸ ਨਵੀਂ ਕੰਪਨੀ ਵਿੱਚ ਓਰੇਕਲ, ਸਿਲਵਰ ਲੇਕ ਅਤੇ MGX ਦੀ 15-15 ਫੀਸਦੀ ਹਿੱਸੇਦਾਰੀ ਹੋਵੇਗੀ, ਜਦਕਿ ਮੂਲ ਕੰਪਨੀ ਬਾਈਟਡਾਂਸ (ByteDance) ਕੋਲ 19.9 ਫੀਸਦੀ ਹਿੱਸਾ ਰਹੇਗਾ। ਡੈੱਲ ਟੈਕਨਾਲੋਜੀਜ਼ ਦੇ ਸੰਸਥਾਪਕ ਮਾਈਕਲ ਡੈੱਲ ਵੀ ਇਸ ਵਿੱਚ ਨਿਵੇਸ਼ਕ ਵਜੋਂ ਸ਼ਾਮਲ ਹਨ।
ਰਾਸ਼ਟਰੀ ਸੁਰੱਖਿਆ ਅਤੇ ਡਾਟਾ ਪ੍ਰੋਟੈਕਸ਼ਨ
ਇਹ ਨਵੀਂ ਕੰਪਨੀ ਅਮਰੀਕੀ ਰਾਸ਼ਟਰੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਵਿਸ਼ੇਸ਼ ਸੁਰੱਖਿਆ ਨਿਯਮਾਂ ਤਹਿਤ ਕੰਮ ਕਰੇਗੀ। ਅਮਰੀਕੀ ਉਪਭੋਗਤਾਵਾਂ ਦਾ ਡਾਟਾ ਸਥਾਨਕ ਪੱਧਰ ‘ਤੇ ਓਰੇਕਲ ਦੁਆਰਾ ਚਲਾਏ ਜਾਂਦੇ ਸਿਸਟਮ ਵਿੱਚ ਸਟੋਰ ਕੀਤਾ ਜਾਵੇਗਾ। ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਟਿੱਕਟੌਕ ਦੇ ਐਲਗੋਰਿਦਮ (algorithm) ਨੂੰ ਅਮਰੀਕੀ ਡਾਟਾ ਦੇ ਆਧਾਰ ‘ਤੇ ਦੁਬਾਰਾ ਸਿਖਲਾਈ ਦਿੱਤੀ ਜਾਵੇਗੀ ਅਤੇ ਅਪਡੇਟ ਕੀਤਾ ਜਾਵੇਗਾ। ਹਾਲਾਂਕਿ ਬਾਈਟਡਾਂਸ ਇਸ ਐਲਗੋਰਿਦਮ ਦਾ ਲਾਇਸੈਂਸ ਦੇਵੇਗੀ, ਪਰ ਅਮਰੀਕੀ ਕੰਪਨੀ ਇਸ ਦੀ ਸੁਰੱਖਿਆ ਅਤੇ ਸਮੱਗਰੀ ਦੀ ਨਿਗਰਾਨੀ ਲਈ ਜ਼ਿੰਮੇਵਾਰ ਹੋਵੇਗੀ।
ਐਡਮ ਪ੍ਰੈਸਰ ਹੋਣਗੇ ਨਵੇਂ CEO
ਨਵੀਂ ਕੰਪਨੀ ਦੀ ਕਮਾਨ ਐਡਮ ਪ੍ਰੈਸਰ (Adam Presser) ਦੇ ਹੱਥਾਂ ਵਿੱਚ ਹੋਵੇਗੀ, ਜੋ ਇਸ ਦੇ CEO ਵਜੋਂ ਕੰਮ ਕਰਨਗੇ। ਕੰਪਨੀ ਦਾ ਬੋਰਡ ਆਫ਼ ਡਾਇਰੈਕਟਰਜ਼ ਸੱਤ ਮੈਂਬਰੀ ਹੋਵੇਗਾ, ਜਿਸ ਵਿੱਚ ਬਹੁਗਿਣਤੀ ਅਮਰੀਕੀਆਂ ਦੀ ਹੋਵੇਗੀ ਅਤੇ ਇਸ ਵਿੱਚ ਟਿੱਕਟੌਕ ਦੇ ਮੌਜੂਦਾ CEO ਸ਼ੌ ਚਿਊ (Shou Chew) ਵੀ ਸ਼ਾਮਲ ਹੋਣਗੇ।
ਬੰਦ ਹੁੰਦੇ-ਹੁੰਦੇ ਬਚਿਆ TikTok
ਜ਼ਿਕਰਯੋਗ ਹੈ ਕਿ ਜੋਅ ਬਾਈਡਨ ਦੇ ਕਾਰਜਕਾਲ ਦੌਰਾਨ ਇੱਕ ਕਾਨੂੰਨ ਪਾਸ ਕੀਤਾ ਗਿਆ ਸੀ, ਜਿਸ ਤਹਿਤ ਜਨਵਰੀ 2025 ਤੱਕ ਟਿੱਕਟੌਕ ਨੂੰ ਕਿਸੇ ਅਮਰੀਕੀ ਕੰਪਨੀ ਨੂੰ ਵੇਚਣਾ ਲਾਜ਼ਮੀ ਸੀ, ਨਹੀਂ ਤਾਂ ਇਸ ‘ਤੇ ਪਾਬੰਦੀ ਲੱਗ ਸਕਦੀ ਸੀ। ਕੁਝ ਘੰਟਿਆਂ ਲਈ ਇਹ ਐਪ ਬੰਦ ਵੀ ਹੋਈ। ਹਾਲਾਂਕਿ, ਰਾਸ਼ਟਰਪਤੀ ਟਰੰਪ ਨੇ ਅਹੁਦਾ ਸੰਭਾਲਦਿਆਂ ਹੀ ਪਹਿਲੇ ਦਿਨ ਕਾਰਜਕਾਰੀ ਹੁਕਮ ਜਾਰੀ ਕਰਕੇ ਇਸ ਨੂੰ ਚਾਲੂ ਰੱਖਿਆ ਅਤੇ ਇਸ ਨਵੀਂ ਡੀਲ ਦਾ ਰਸਤਾ ਸਾਫ਼ ਕੀਤਾ।