ਨਵੀਂ ਦਿੱਲੀ- ਕਾਂਗਰਸ ਨੇ ਲੋਕ ਸਭਾ ਚੋਣਾਂ ਲਈ ਸ਼ਨੀਵਾਰ ਨੂੰ 6 ਹੋਰ ਉਮੀਦਵਾਰ ਐਲਾਨ ਕੀਤੇ, ਜਿਨ੍ਹਾਂ ਵਿਚੋਂ ਸਭ ਤੋਂ ਪ੍ਰਮੁੱਖ ਨਾਂ ਵਿਰੀਯਾਟੋ ਫਰਨਾਂਡੀਸ ਦਾ ਹੈ, ਜਿਨ੍ਹਾਂ ਨੂੰ ਦੱਖਣੀ ਗੋਆ ਲੋਕ ਸਭਾ ਖੇਤਰ ਤੋਂ ਮੌਜੂਦਾ ਸੰਸਦ ਮੈਂਬਰ ਫਰਾਂਸਿਸਕੋ ਸਾਰਦਿਨਹਾ ਦੀ ਟਿਕਟ ਕੱਟ ਕੇ ਉਮੀਦਵਾਰ ਬਣਾਇਆ ਹੈ। ਕਾਂਗਰਸ ਦੇ ਸੀਨੀਅਰ ਨੇਤਾ ਸਾਰਦਿਨਹਾ ਗੋਆ ਦੇ ਮੁੱਖ ਮੰਤਰੀ ਵੀ ਰਹੇ ਹਨ। ਕਾਂਗਰਸ ਪਾਰਟੀ ਨੇ ਉੱਤਰੀ ਗੋਆ ਲੋਕ ਸਭਾ ਖੇਤਰ ਤੋਂ ਸਾਬਕਾ ਕੇਂਦਰੀ ਮੰਤਰੀ ਰਮਾਕਾਂਤ ਖਲਪ ਨੂੰ ਟਿਕਟ ਦਿੱਤੀ ਹੈ। ਮੱਧ ਪ੍ਰਦੇਸ਼ ਦੇ ਮੁਰੈਨਾ ਤੋਂ ਸਤਿਆਪਾਲ ਸਿੰਘ ਸੀਕਰਵਾਰ, ਗਵਾਲੀਅਰ ਤੋਂ ਪ੍ਰਵੀਅ ਪਾਠਕ ਅਤੇ ਖੰਡਵਾ ਤੋਂ ਨਰੇਂਦਰ ਪਟੇਲ ਨੂੰ ਉਮੀਦਵਾਰ ਬਣਾਇਆ ਹੈ।
ਉਥੇ ਹੀ ਦਾਦਰਾ ਅਤੇ ਨਗਰ ਹਵੇਲੀ ਤੋਂ ਅਜੀਤ ਰਾਮਜੀ ਭਾਈ ਮਹਲਾ ਨੂੰ ਟਿਕਟ ਦਿੱਤੀ ਗਈ ਹੈ। ਕਾਂਗਰਸ ਹੁਣ ਤੱਕ ਕੁੱਲ 241 ਉਮੀਦਵਾਰਾਂ ਦਾ ਐਲਾਨ ਕਰ ਚੁੱਕੀ ਹੈ। ਇਸ ਤੋਂ ਪਹਿਲਾਂ ਉਸ ਨੇ 13 ਵੱਖ-ਵੱਖ ਸੂਚੀਆਂ ‘ਚ 235 ਉਮੀਦਵਾਰ ਐਲਾਨ ਕੀਤੇ ਸਨ। ਦੇਸ਼ ਵਿਚ 18ਵੀਂ ਲੋਕ ਸਭਾ ਲਈ ਚੋਣਾਂ 19 ਅਪ੍ਰੈਲ ਤੋਂ ਸ਼ੁਰੂ ਹੋਣਗੀਆਂ। ਇਸ ਤੋਂ ਬਾਅਦ 6 ਹੋਰ ਪੜਾਵਾਂ ਵਿਚ 26 ਅਪ੍ਰੈਲ, 7 ਅਪ੍ਰੈਲ, 13 ਮਈ, 20 ਮਈ, 25 ਮਈ ਅਤੇ 1 ਜੂਨ ਨੂੰ ਵੋਟਾਂ ਪੈਣਗੀਆਂ। ਵੋਟਾਂ ਦੀ ਗਿਣਤੀ 4 ਜੂਨ ਨੂੰ ਹੋਵੇਗੀ।
