ਨੈਸ਼ਨਲ ਡੈਸਕ : ਅਰੁਣਾਚਲ ਪ੍ਰਦੇਸ਼ ਅਤੇ ਉਸ ਦੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਦੋ ਵਾਰ ਭੂਚਾਲ ਦੇ ਤੇਜ਼ ਝਟਕੇ ਮਹਿਸੂਸ ਕੀਤੇ ਗਏ। ਇਸ ਦੀ ਜਾਣਕਾਰੀ ਨੈਸ਼ਨਲ ਸੈਂਟਰ ਫਾਰ ਸਿਜ਼ਮੋਲੋਜੀ (ਐਨਸੀਐਸ) ਵਲੋਂ ਦਿੱਤੀ ਗਈ। ਭੂਚਾਲ ਦਾ ਪਹਿਲਾ ਝਟਕਾ 5.1 ਤੀਬਰਤਾ ਦਾ ਸੀ ਅਤੇ ਦੂਜਾ 3.5 ਤੀਬਰਤਾ ਦਾ ਸੀ। ਦੋਵੇਂ ਭੂਚਾਲਾਂ ਦਾ ਕੇਂਦਰ ਅੱਪਰ ਸਿਆਂਗ ਜ਼ਿਲ੍ਹਾ ਸੀ। ਭੂਚਾਲ ਦੇ ਲੱਗੇ ਤੇਜ਼ ਝਟਕਿਆਂ ਤੋਂ ਬਾਅਦ ਕਿਸੇ ਤਰ੍ਹਾਂ ਦਾ ਜਾਨ-ਮਾਲ ਦਾ ਨੁਕਸਾਨ ਹੋਣ ਦੀ ਕੋਈ ਰਿਪੋਰਟ ਨਹੀਂ ਮਿਲੀ।
ਜਾਣਕਾਰੀ ਅਨੁਸਾਰ, ਉਕਤ ਸਥਾਨ ‘ਤੇ ਭੂਚਾਲ ਦਾ ਪਹਿਲਾ ਝਟਕਾ ਸਵੇਰੇ 5:45 ਵਜੇ ਮਹਿਸੂਸ ਕੀਤਾ ਗਿਆ ਅਤੇ ਦੂਜਾ ਝਟਕਾ ਸਵੇਰੇ 7:17 ਵਜੇ ਮਹਿਸੂਸ ਕੀਤਾ ਗਿਆ। ਐਨਸੀਐਸ ਨੇ ਰਿਪੋਰਟ ਦਿੱਤੀ ਕਿ ਮੁੱਖ ਭੂਚਾਲ ਸਵੇਰੇ 5:45 ਵਜੇ 11 ਕਿਲੋਮੀਟਰ ਦੀ ਡੂੰਘਾਈ ‘ਤੇ ਆਇਆ, ਜਿਸਦਾ ਕੇਂਦਰ ਪੰਗਿਨ ਤੋਂ 116 ਕਿਲੋਮੀਟਰ ਉੱਤਰ-ਉੱਤਰ-ਪੱਛਮ ਵਿੱਚ ਸੀ। ਅਰੁਣਾਚਲ ਪ੍ਰਦੇਸ਼ ਅਤੇ ਪੂਰਾ ਉੱਤਰ-ਪੂਰਬੀ ਖੇਤਰ ‘ਭੂਚਾਲ ਜ਼ੋਨ 5’ ਵਿੱਚ ਆਉਂਦਾ ਹੈ। ਪੂਰਬੀ ਹਿਮਾਲਿਆ ਦੇ ਹੇਠਾਂ ਗੁੰਝਲਦਾਰ ਭੂ-ਵਿਗਿਆਨਕ ਪ੍ਰਣਾਲੀ ਦੇ ਕਾਰਨ ਇਸ ਖੇਤਰ ਨੂੰ ਭੂਚਾਲ ਦੀ ਗਤੀਵਿਧੀ ਲਈ ਬਹੁਤ ਜ਼ਿਆਦਾ ਕਮਜ਼ੋਰ ਮੰਨਿਆ ਜਾਂਦਾ ਹੈ।
