ਦੱਖਣ-ਪੂਰਬੀ ਦਿੱਲੀ ‘ਚ ਜ਼ੋਰਦਾਰ ਗੈਸ ਸਿਲੰਡਰ ਧਮਾਕਾ, ਤਿੰਨ ਲੋਕ ਜ਼ਖਮੀ

ਨਵੀਂ ਦਿੱਲੀ : ਦੱਖਣ-ਪੂਰਬੀ ਦਿੱਲੀ ਦੇ ਮਦਨਪੁਰ ਖਾਦਰ ਇਲਾਕੇ ਵਿੱਚ ਸ਼ਨੀਵਾਰ ਸਵੇਰੇ ਇੱਕ ਘਰ ਵਿੱਚ ਸ਼ੱਕੀ ਗੈਸ ਸਿਲੰਡਰ ਧਮਾਕੇ ਵਿੱਚ ਇੱਕ ਜੋੜਾ ਅਤੇ ਉਨ੍ਹਾਂ ਦਾ 22 ਸਾਲਾ ਪੁੱਤਰ ਗੰਭੀਰ ਜ਼ਖਮੀ ਹੋ ਗਏ। ਜ਼ਖਮੀਆਂ ਦੀ ਪਛਾਣ ਜਗਦੀਸ਼ (60), ਉਸਦੀ ਪਤਨੀ ਲਕਸ਼ਮੀ ਅਤੇ ਉਨ੍ਹਾਂ ਦੇ ਪੁੱਤਰ ਜਤਿਨ ਵਜੋਂ ਹੋਈ ਹੈ। ਇਸ ਘਟਨਾ ਦੀ ਜਾਣਕਾਰੀ ਦਿੱਲੀ ਫਾਇਰ ਸਰਵਿਸ ਦੇ ਇੱਕ ਅਧਿਕਾਰੀ ਵਲੋਂ ਦਿੱਤੀ ਗਈ ਹੈ।
ਇਸ ਘਟਨਾ ਵਿਚ ਜਗਦੀਸ਼ ਲਗਭਗ 80 ਪ੍ਰਤੀਸ਼ਤ ਝੁਲਸ ਗਿਆ, ਜਦਕਿ ਉਸਦੀ ਪਤਨੀ ਲਗਭਗ 70 ਪ੍ਰਤੀਸ਼ਤ ਅਤੇ ਪੁੱਤਰ ਲਗਭਗ 25 ਪ੍ਰਤੀਸ਼ਤ ਸੜ ਗਿਆ। ਅਧਿਕਾਰੀ ਨੇ ਕਿਹਾ ਕਿ ਵਿਭਾਗ ਨੂੰ ਸਵੇਰੇ 4:46 ਵਜੇ ਇੱਕ ਕਾਲ ਆਈ, ਜਿਸ ਤੋਂ ਬਾਅਦ ਤਿੰਨ ਫਾਇਰ ਟੈਂਡਰ ਮੌਕੇ ‘ਤੇ ਭੇਜੇ ਗਏ। ਡੀਐਫਐਸ ਅਧਿਕਾਰੀ ਨੇ ਕਿਹਾ, “ਤਿੰਨੋਂ ਜ਼ਖਮੀਆਂ ਨੂੰ ਐਂਬੂਲੈਂਸ ਰਾਹੀਂ ਸਫਦਰਜੰਗ ਹਸਪਤਾਲ ਲਿਜਾਇਆ ਗਿਆ।”