‘ਟੈਕਸਪੇਅਰਾਂ ਦੇ ਪੈਸੇ ਨਾਲ ਉੱਡ ਰਹੇ ਨੇ ਚਾਰਟਰਡ ਪਲੇਨ’, RP ਸਿੰਘ ਨੇ ਪੰਜਾਬ ਸਰਕਾਰ ‘ਤੇ ਕੀਤਾ ਤਿੱਖਾ ਹਮਲਾ

ਨੈਸ਼ਨਲ ਡੈਸਕ : ਭਾਰਤੀ ਜਨਤਾ ਪਾਰਟੀ (ਬੀਜੇਪੀ) ਦੇ ਰਾਸ਼ਟਰੀ ਬੁਲਾਰੇ ਆਰ.ਪੀ. ਸਿੰਘ ਨੇ ਪੰਜਾਬ ਦੀ ਆਮ ਆਦਮੀ ਪਾਰਟੀ (ਆਪ) ਸਰਕਾਰ ‘ਤੇ ਤਿੱਖਾ ਨਿਸ਼ਾਨਾ ਸਾਧਦਿਆਂ ਸੂਬੇ ਦੇ ਵਿੱਤੀ ਪ੍ਰਬੰਧਨ ਅਤੇ ‘ਵੀਆਈਪੀ ਕਲਚਰ’ ‘ਤੇ ਸਵਾਲ ਚੁੱਕੇ ਹਨ। ਉਨ੍ਹਾਂ ਨੇ ਪੰਜਾਬ ਸਰਕਾਰ ਵੱਲੋਂ ਪਾਰਟੀ ਆਗੂਆਂ ਦੇ ਦੌਰਿਆਂ ਲਈ ਵਰਤੇ ਜਾ ਰਹੇ ਚਾਰਟਰਡ ਪਲੇਨ ਨੂੰ ਭਾਰਤ ਦੀ “ਸਭ ਤੋਂ ਮਹਿੰਗੀ ਉਬੇਰ” (Most Expensive Uber) ਕਰਾਰ ਦਿੱਤਾ ਹੈ।
ਕਰਜ਼ੇ ਹੇਠ ਦਬਿਆ ਪੰਜਾਬ, ਪਰ ਹਵਾਈ ਸਫ਼ਰ ‘ਤੇ ਲੱਖਾਂ ਦਾ ਖਰਚਾ
ਆਰ.ਪੀ. ਸਿੰਘ ਅਨੁਸਾਰ ਜਿੱਥੇ ਪੰਜਾਬ ਸੂਬਾ ਪਹਿਲਾਂ ਹੀ 5 ਲੱਖ ਕਰੋੜ ਰੁਪਏ ਦੇ ਭਾਰੀ ਕਰਜ਼ੇ ਹੇਠ ਦਬਿਆ ਹੋਇਆ ਹੈ, ਉੱਥੇ ਹੀ ਸਰਕਾਰ ਪਾਰਟੀ ਆਗੂਆਂ ਨੂੰ ਗੁਜਰਾਤ ਤੇ ਗੋਆ ਦੇ ਸਿਆਸੀ ਦੌਰੇ ਕਰਵਾਉਣ ਲਈ ਜਨਤਾ ਦੇ ਪੈਸੇ ਦੀ ਦੁਰਵਰਤੋਂ ਕਰ ਰਹੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਅਜਿਹੇ ਇੱਕ ਗੇੜੇ (Trip) ਦਾ ਖਰਚਾ ਲਗਭਗ 50 ਲੱਖ ਰੁਪਏ ਆ ਰਿਹਾ ਹੈ, ਜਿਸ ਦਾ ਬੋਝ ਪੰਜਾਬ ਦੇ ਟੈਕਸਪੇਅਰਾਂ ‘ਤੇ ਪੈ ਰਿਹਾ ਹੈ।
ਭਗਵੰਤ ਮਾਨ ਨੂੰ ਦੱਸਿਆ ‘ਵੀਆਈਪੀ ਟ੍ਰੈਵਲ ਏਜੰਟ’
ਬੀਜੇਪੀ ਆਗੂ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ‘ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਉਹ ਸੂਬੇ ਦੇ ਵਧ ਰਹੇ ਕਰਜ਼ੇ ਨੂੰ ਸੰਭਾਲਣ ਦੀ ਬਜਾਏ ਦਿੱਲੀ ਦੇ ਆਗੂਆਂ ਲਈ “ਪਾਇਲਟ” ਅਤੇ “ਵੀਆਈਪੀ ਟ੍ਰੈਵਲ ਏਜੰਟ” ਵਜੋਂ ਕੰਮ ਕਰ ਰਹੇ ਹਨ। ਉਨ੍ਹਾਂ ਸਵਾਲ ਕੀਤਾ ਕਿ ਜਿਸ ਪਾਰਟੀ ਨੇ ਵੀਆਈਪੀ ਕਲਚਰ ਦੇ ਵਿਰੋਧ ਵਿੱਚ ਸਿਆਸਤ ਸ਼ੁਰੂ ਕੀਤੀ ਸੀ, ਉਸ ਲਈ ਹੁਣ 20,000 ਰੁਪਏ ਦੀ ਵਪਾਰਕ ਉਡਾਣ ਵੀ ‘ਬਹੁਤ ਬੇਸਿਕ’ ਹੋ ਗਈ ਹੈ।
ਭ੍ਰਿਸ਼ਟਾਚਾਰ ਅਤੇ ਅਸਤੀਫਿਆਂ ‘ਤੇ ਵੀ ਘੇਰਿਆ
ਬੀਜੇਪੀ ਨੇ ਪੰਜਾਬ ਸਰਕਾਰ ‘ਤੇ “ਰੈਂਪੰਟ ਭ੍ਰਿਸ਼ਟਾਚਾਰ” ਦੇ ਦੋਸ਼ ਵੀ ਲਾਏ ਹਨ। ਆਰ.ਪੀ. ਸਿੰਘ ਨੇ ਕਿਹਾ ਕਿ ਮੰਤਰੀ ਲਾਲਜੀਤ ਸਿੰਘ ਭੁੱਲਰ ਦਾ ਖੁਦਕੁਸ਼ੀ ਲਈ ਉਕਸਾਉਣ ਦੇ ਮਾਮਲੇ ਵਿੱਚ ਅਸਤੀਫਾ ਅਤੇ ਕਈ ਵਿਧਾਇਕਾਂ ਦੀਆਂ ਗ੍ਰਿਫਤਾਰੀਆਂ ਇਹ ਦਰਸਾਉਂਦੀਆਂ ਹਨ ਕਿ ਸਰਕਾਰ ਦਾ “ਜ਼ੀਰੋ-ਟੌਲਰੈਂਸ” ਦਾ ਵਾਅਦਾ ਸਿਰਫ ਕਹਿਣ ਦੀਆਂ ਗੱਲਾਂ ਹਨ। ਉਨ੍ਹਾਂ ਇਲਜ਼ਾਮ ਲਾਇਆ ਕਿ ਅਧਿਕਾਰੀਆਂ ਨੂੰ ਕਥਿਤ ਤੌਰ ‘ਤੇ ਗੈਰ-ਕਾਨੂੰਨੀ ਟੈਂਡਰਾਂ ਲਈ ਮਜਬੂਰ ਕੀਤਾ ਜਾ ਰਿਹਾ ਹੈ।