ਨਵੀਂ ਦਿੱਲੀ- ਸੁਪਰੀਮ ਕੋਰਟ ਨੇ ਸ਼ੁੱਕਰਵਾਰ ਨੂੰ ਕਤਲ ਦੇ ਮਾਮਲੇ ‘ਚ ਉਮਰ ਕੈਦ ਦੀ ਸਜ਼ਾ ਕੱਟ ਰਹੇ 105 ਸਾਲਾ ਦੇ ਰਸਿਕ ਚੰਦਰ ਮੰਡਲ ਨੂੰ ਰਿਹਾਅ ਕਰ ਦਿੱਤਾ। ਮੰਡਲ ਨੂੰ 1988 ਦੇ ਕਤਲ ਦੇ ਇਕ ਮਾਮਲੇ ‘ਚ 1994 ‘ਚ ਦੋਸ਼ੀ ਠਹਿਰਾਇਆ ਗਿਆ ਸੀ ਅਤੇ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। ਅਦਾਲਤ ਨੇ 29 ਨਵੰਬਰ 2024 ਦੇ ਉਸ ਆਦੇਸ਼ ਨੂੰ ਸਹੀ ਠਹਿਰਾਇਆ, ਜਿਸ ਦੇ ਅਧੀਨ ਉਸ ਨੂੰ ਅੰਤਰਿਮ ਜ਼ਮਾਨਤ/ਪੈਰੋਲ ਦਿੱਤੀ ਗਈ ਸੀ ਅਤੇ ਉਸ ਦੀ ਬਚੀ ਹੋਈ ਸਜ਼ਾ (ਜੇਕਰ ਕੋਈ ਹੋਵੇ) ਨੂੰ ਮੁਆਫ਼ ਕਰ ਦਿੱਤਾ ਗਿਆ ਸੀ।
ਚੀਫ਼ ਜਸਟਿਸ ਸੂਰਿਆ ਕਾਂਤ, ਜਸਟਿਸ ਜੋਇਮਲਿਆ ਬਾਗਚੀ ਅਤੇ ਜਸਟਿਸ ਵੀ. ਮੋਹਨਾ ਦੀ ਬੈਂਚ ਨੇ ਮੰਡਲ ਦੀ ਵਧਦੀ ਉਮਰ ਨੂੰ ਧਿਆਨ ‘ਚ ਰੱਖਦੇ ਹੋਏ ਕਿਹਾ ਕਿ ਉਹ ਮਾਮਲੇ ਨੂੰ ਬੰਦ ਕਰ ਰਹੇ ਹਨ ਅਤੇ ਉਸ ਨੂੰ ਦੁਬਾਰਾ ਹਿਰਾਸਤ ‘ਚ ਨਹੀਂ ਲਿਆ ਜਾਵੇਗਾ। ਜਸਟਿਸ ਸੂਰਿਆ ਕਾਂਤ ਨੇ ਕਿਹਾ,”ਭਾਵੇਂ ਉਮਰ ਕੈਦ ਪੂਰੀ ਨਹੀਂ ਹੋਈ ਹੈ, ਉਸ ਨੂੰ ਦੁਬਾਰਾ ਹਿਰਾਸਤ ‘ਚ ਨਹੀਂ ਲਿਆ ਜਾਵੇਗਾ।” ਇਸ ਦੇ ਨਾਲ, ਉਨ੍ਹਾਂ ਨੇ ਮੰਡਲ ਨੂੰ ਜ਼ਮਾਨਤ ਦੇਣ ਵਾਲੇ 29 ਨਵੰਬਰ, 2024 ਦੇ ਆਦੇਸ਼ ਨੂੰ ਪੱਕਾ ਅਤੇ ਅੰਤਿਮ ਬਣਾ ਦਿੱਤਾ। ਸਾਲ 1920 ‘ਚ ਪੱਛਮੀ ਬੰਗਾਲ ਦੇ ਮਾਲਦਾ ਜ਼ਿਲ੍ਹੇ ‘ਚ ਜਨਮੇ ਮੰਡਲ ਨੂੰ 1994 ‘ਚ ਦੋਸ਼ੀ ਠਹਿਰਾਇਆ ਗਿਆ ਸੀ ਅਤੇ ਉਹ 29 ਨਵੰਬਰ 2024 ਤੱਕ ਜੇਲ੍ਹ ‘ਚ ਰਿਹਾ।
ਉਸ ਦਿਨ ਸੁਪਰੀਮ ਕੋਰਟ ਦੀ ਇਕ ਬੈਂਚ ਨੇ ਉਸ ਨੂੰ ਅੰਤਰਿਮ ਜ਼ਮਾਨਤ/ਪੈਰੋਲ ਦਿੱਤੀ ਸੀ। ਉਦੋਂ ਤੱਕ ਉਹ 30 ਸਾਲਾਂ ਤੋਂ ਵੱਧ ਸਮਾਂ ਹਿਰਾਸਤ ‘ਚ ਬਿਤਾ ਚੁੱਕਿਆ ਸੀ। ਬੈਂਚ ‘ਚ ਸਾਬਕਾ ਸੀਜੇਆਈ ਸੰਜੀਵ ਖੰਨਾ ਅਤੇ ਜਸਟਿਸ ਸੰਜੇ ਕੁਮਾਰ ਸ਼ਾਮਲ ਸਨ। 29 ਨਵੰਬਰ 2024 ਦੇ ਆਪਣੇ ਆਦੇਸ਼ ‘ਚ ਸੁਪਰੀਮ ਕੋਰਟ ਨੇ ਕਿਹਾ,”ਅੰਤਰਿਮ ਹੁਕਮ ਦੇ ਜ਼ਰੀਏ, ਅਸੀਂ ਨਿਰਦੇਸ਼ ਦਿੰਦੇ ਹਾਂ ਕਿ ਪਟੀਸ਼ਨਰ, ਰਸਿਕ ਚੰਦਰ ਮੰਡਲ ਨੂੰ ਮੌਜੂਦਾ ਰਿੱਟ ਪਟੀਸ਼ਨ ਦੇ ਪੈਂਡਿੰਗ ਹੋਣ ਦੌਰਾਨ ਅੰਤਰਿਮ ਜ਼ਮਾਨਤ/ਪੈਰੋਲ ‘ਤੇ ਰਿਹਾਅ ਕੀਤਾ ਜਾਵੇ। ਇਸ ਲਈ ਸ਼ਰਤਾਂ ਦਾ ਫੈਸਲਾ ਹੇਠਲੀ ਅਦਾਲਤ ਦੁਆਰਾ ਕੀਤਾ ਜਾਵੇਗਾ।” 9 ਜੁਲਾਈ 2026 ਨੂੰ, ਮੰਡਲ ਦੀ ਨੁਮਾਇੰਦਗੀ ਕਰਨ ਵਾਲੇ ਵਕੀਲ ਨੇ ਕਿਹਾ ਕਿ ਉਹ ਪੂਰੀ ਤਰ੍ਹਾਂ ਅਸਮਰੱਥ ਹੋ ਗਿਆ ਹਨ। ਸਾਲ 2018 ‘ਚ ਕਲਕੱਤਾ ਹਾਈ ਕੋਰਟ ਨੇ ਮੰਡਲ ਦੀ ਉਸਦੀ ਕਤਲ ਦੀ ਸਜ਼ਾ ਵਿਰੁੱਧ ਅਪੀਲ ਖਾਰਜ ਕਰ ਦਿੱਤੀ। 12 ਅਕਤੂਬਰ 2020 ਨੂੰ ਮੰਡਲ (ਜੋ ਉਸ ਸਮੇਂ 99 ਸਾਲ ਦਾ ਸੀ) ਨੇ ਆਪਣੀ ਵਧਦੀ ਉਮਰ ਅਤੇ ਉਮਰ ਨਾਲ ਸਬੰਧਤ ਬੀਮਾਰੀਆਂ ਦਾ ਹਵਾਲਾ ਦਿੰਦੇ ਹੋਏ ਸੁਪਰੀਮ ਕੋਰਟ ‘ਚ ਸਮੇਂ ਤੋਂ ਪਹਿਲਾਂ ਰਿਹਾਈ ਦੀ ਮੰਗ ਕਰਦੇ ਹੋਏ ਇੱਕ ਪਟੀਸ਼ਨ ਦਾਇਰ ਕੀਤੀ ਸੀ।
