ਲਾਹੌਰ- ਪਾਕਿਸਤਾਨ ਦੇ ਵੱਡੇ ਸ਼ਹਿਰ ਲਾਹੌਰ ’ਚ ਔਰਤਾਂ ਵਿਰੁੱਧ ਜਿਣਸੀ ਹਿੰਸਾ ਦੀਆਂ ਘਟਨਾਵਾਂ ਵਿਚ ਰਿਕਾਰਡ ਵਾਧਾ ਹੋਇਆ ਹੈ। ਇਸ ਸਾਲ 11 ਮਹੀਨਿਆਂ ’ਚ ਇਕੱਲੇ ਲਾਹੌਰ ਸ਼ਹਿਰ ’ਚ ਔਰਤਾਂ ਦੇ ਜਿਣਸੀ ਸ਼ੋਸ਼ਣ ਅਤੇ ਉਨ੍ਹਾਂ ’ਤੇ ਹਿੰਸਾ ਦੀਆਂ 854 ਘਟਨਾਵਾਂ ਵਾਪਰੀਆਂ ਅਤੇ ਪੁਲਸ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰਨ ’ਚ ਸਫ਼ਲਤਾ ਹਾਸਲ ਨਹੀਂ ਕਰ ਸਕੀ। ਜਿਣਸੀ ਸ਼ੋਸ਼ਣ ਦਾ ਸ਼ਿਕਾਰ ਜ਼ਿਆਦਾਤਰ ਗੈਰ-ਮੁਸਲਿਮ ਔਰਤਾਂ ਅਤੇ ਕੁੜੀਆਂ ਸਨ।
ਸਰਹੱਦ ਪਾਰਲੇ ਸੂਤਰਾਂ ਅਨੁਸਾਰ ਔਰਤਾਂ ਵਿਰੁੱਧ ਜਿਣਸੀ ਹਿੰਸਾ ਦੇ ਮਾਮਲਿਆਂ ’ਚ ਲਾਹੌਰ ਕੈਂਟ 241 ਕੇਸ ਦਰਜ ਕਰ ਕੇ ਡਵੀਜ਼ਨ ’ਚ ਪਹਿਲੇ ਨੰਬਰ ’ਤੇ ਹੈ ਅਤੇ ਸਦਰ ਡਵੀਜ਼ਨ 197 ਕੇਸਾਂ ਨਾਲ ਦੂਜੇ ਨੰਬਰ ’ਤੇ ਹੈ। ਮਾਡਲ ਟਾਊਨ 139 ਘਟਨਾਵਾਂ ਨਾਲ ਤੀਜੇ, ਇਕਬਾਲ ਟਾਊਨ 57 ਘਟਨਾਵਾਂ ਨਾਲ ਚੌਥੇ, ਸਿਵਲ ਲਾਈਨ 52 ਘਟਨਾਵਾਂ ਨਾਲ ਪੰਜਵੇਂ ਅਤੇ ਸਿਟੀ ਡਵੀਜ਼ਨ 45 ਘਟਨਾਵਾਂ ਨਾਲ ਛੇਵੇਂ ਸਥਾਨ ’ਤੇ ਹੈ। ਔਰਤਾਂ ਅਤੇ ਨਾਬਾਲਿਗ ਕੁੜੀਆਂ ਵਿਰੁੱਧ ਸਮੂਹਿਕ ਜਿਣਸੀ ਹਿੰਸਾ ਦੀਆਂ 8 ਘਟਨਾਵਾਂ ਨਾਲ ਸਿਟੀ ਡਵੀਜ਼ਨ ਅਤੇ ਸਦਰ ਡਵੀਜ਼ਨ ਕ੍ਰਮਵਾਰ ਪਹਿਲੇ ਅਤੇ ਦੂਜੇ ਸਥਾਨ ’ਤੇ ਹਨ। ਜਵਾਨ ਕੁੜੀਆਂ ਵਿਰੁੱਧ ਜਿਣਸੀ ਹਿੰਸਾ ਦੇ ਮਾਮਲਿਆਂ ’ਚ ਸਦਰ ਡਵੀਜ਼ਨ 30 ਮਾਮਲਿਆਂ ਨਾਲ ਸੂਚੀ ’ਚ ਸਭ ਤੋਂ ਉੱਪਰ ਹੈ।
