ਬੈਂਗਲੁਰੂ: ਮੇਜ਼ਬਾਨ ਭਾਰਤ ਨੇ ਕੁਵੈਤ ਨੂੰ ਪੈਨਲਟੀ ਸ਼ੂਟਆਊਟ ‘ਚ 5-4 ਨਾਲ ਹਰਾ ਕੇ ਨੌਵੀਂ ਵਾਰ ਸੈਫ਼ ਫ਼ੁੱਟਬਾਲ ਚੈਂਪੀਅਨਸ਼ਿਪ ਦਾ ਖ਼ਿਤਾਬ ਜਿੱਤ ਲਿਆ ਹੈ। ਦੋਵੇਂ ਟੀਮਾਂ 120 ਮਿੰਟ ਦੀ ਖੇਡ ਤਕ 1-1 ਨਾਲ ਬਰਾਬਰੀ ‘ਤੇ ਸਨ। ਪੈਨਲਟੀ ਸ਼ੂਟਆਊਟ ਦੇ ਪੰਜ ਦੌਰਾਂ ਤੋਂ ਬਾਅਦ ਵੀ ਸਕੋਰ 4-4 ਸੀ ਜਿਸ ਮਗਰੋਂ ਸਡਨ ਡੈੱਥ ‘ਤੇ ਫ਼ੈਸਲਾ ਹੋਇਆ।
ਮਹੇਸ਼ ਨੋਰੇਮ ਨੇ ਸਕੋਰ ਕੀਤਾ ਅਤੇ ਭਾਰਤ ਦੇ ਗੋਲਕੀਪਰ ਗੁਰਪ੍ਰੀਤ ਸੰਧੂ ਨੇ ਡਾਈਵ ਲਗਾ ਕੇ ਖ਼ਾਲਿਦ ਹਾਜ਼ਿਆ ਦੀ ਕਿੱਕ ਬਚਾ ਕੇ ਟੀਮ ਨੂੰ ਜਿੱਤ ਦਿਵਾਈ। ਨਿਰਧਾਰਿਤ ਸਮੇਂ ਦੇ ਅੰਦਰ ਸ਼ਬੀਬ ਅਲ ਖ਼ਲੀਦੀ ਨੇ 14ਵੇਂ ਮਿੰਟ ‘ਚ ਗੋਲ ਕਰ ਕੇ ਕੁਵੈਤ ਨੂੰ ਬੜ੍ਹਤ ਦਿਵਾਈ ਸੀ ਜਦਕਿ ਭਾਰਤ ਲਈ ਬਰਾਬਰੀ ਦਾ ਗੋਲ ਲਾਲਿਯਾਂਜੂਆਲਾ ਨੇ 29ਵੇਂ ਮਿੰਟ ‘ਚ ਕੀਤਾ।
ਸਾਬਕਾ ਚੈਂਪੀਅਨ ਭਾਰਤ ਅਤੇ ਕੁਵੈਤ ਨੇ ਆਖਰੀ ਗਰੁੱਪ ਮੈਚ ‘ਚ ਵੀ 1-1 ਨਾਲ ਡਰਾਅ ਖੇਡਿਆ ਸੀ। ਭਾਰਤ ਨੇ ਇਸ ਤੋਂ ਪਹਿਲਾਂ 1993,1997, 1999, 2005, 2009, 2011, 2015, 2021 ਅਤੇ 2023 ‘ਚ ਵੀ ਇਹ ਖ਼ਿਤਾਬ ਜਿੱਤਿਆ ਸੀ। ਭਾਰਤ ਇਸ ਤਰ੍ਹਾਂ ਹੁਣ ਤਕ 9 ਵਾਰ ਖ਼ਿਤਾਬ ਜਿੱਤ ਚੁੱਕਾ ਹੈ ਜਦਕਿ ਚਾਰ ਵਾਰ ਉਹ ਉਪ ਜੇਤੂ ਰਿਹਾ ਹੈ। ਭਾਰਤ ਤੋਂ ਇਲਾਵਾ ਮਾਲਦੀਵਜ਼ ਦਾ ਨਾਂ ਆਉਂਦਾ ਹੈ ਜਿਸ ਨੇ ਦੋ ਵਾਰ 2008 ਅਤੇ 2018 ‘ਚ ਇਹ ਖ਼ਿਤਾਬ ਜਿੱਤਿਆ ਸੀ। ਇਸ ਤੋਂ ਇਲਾਵਾ ਬੰਗਲਾਦੇਸ਼ 2003, ਅਫ਼ਗ਼ਾਨਿਸਤਾਨ 2013 ਅਤੇ ਸ਼੍ਰੀ ਲੰਕਾ 1995 ‘ਚ ਇਹ ਖ਼ਿਤਾਬ ਜਿੱਤ ਚੁੱਕੇ ਹਨ।
