ਨਵੀਂ ਦਿੱਲੀ: ਸਾਬਕਾ ਭਾਰਤੀ ਤੇਜ਼ ਗੇਂਦਬਾਜ਼ ਅਜੀਤ ਅਗਰਕਰ ਨੂੰ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਸੀਨੀਅਰ ਪੁਰਸ਼ ਚੋਣ ਕਮੇਟੀ ਦਾ ਚੇਅਰਮੈਨ ਨਿਯੁਕਤ ਕੀਤਾ ਗਿਆ ਹੈ। BCCI ਨੇ ਉਸ ਦੀ ਨਿਯੁਕਤੀ ਦੀ ਘੋਸ਼ਣਾ ਕਰਨ ਲਈ ਇੱਕ ਅਧਿਕਾਰਿਕ ਬਿਆਨ ਜਾਰੀ ਕੀਤਾ ਜਿਸ ‘ਚ ਲਿਖਿਆ ਹੈ, ”ਕ੍ਰਿਕਟ ਸਲਾਹਕਾਰ ਕਮੇਟੀ – ਜਿਸ ‘ਚ ਸੁਲਕਸ਼ਨਾ ਨਾਇਕ, ਅਸ਼ੋਕ ਮਲਹੋਤਰਾ ਅਤੇ ਜਤਿਨ ਪਰਾਂਜਾਪੇ ਸ਼ਾਮਲ ਸਨ – ਨੇ ਪੁਰਸ਼ਾਂ ਦੀ ਚੋਣ ਕਮੇਟੀ ‘ਚ ਇੱਕ ਚੋਣਕਾਰ ਦੇ ਅਹੁਦੇ ਲਈ ਬਿਨੈਕਾਰਾਂ ਦੀਆਂ ਇੰਟਰਵਿਊਜ਼ ਕੀਤੀਆਂ। ਤਿੰਨ ਮੈਂਬਰੀ CAC ਨੇ ਸਰਬਸੰਮਤੀ ਨਾਲ ਅਜੀਤ ਅਗਰਕਰ ਨੂੰ ਉਕਤ ਅਹੁਦੇ ਨੂੰ ਸੰਭਾਲਣ ਲਈ ਬੇਨਤੀ ਕੀਤੀ ਹੈ।” ਕਮੇਟੀ ਨੇ ਸੀਨੀਆਰਤਾ (ਟੈੱਸਟ ਮੈਚਾਂ ਦੀ ਕੁੱਲ੍ਹ ਗਿਣਤੀ) ਦੇ ਆਧਾਰ ‘ਤੇ ਪੁਰਸ਼ਾਂ ਦੀ ਚੋਣ ਕਮੇਟੀ ਦੇ ਚੇਅਰਪਰਸਨ ਦੀ ਭੂਮਿਕਾ ਲਈ ਅਗਰਕਰ ਦੀ ਸਿਫ਼ਾਰਸ਼ ਕੀਤੀ। ਨਵੀਂ ਚੁਣੀ ਗਈ ਚੋਣ ਕਮੇਟੀ ਮੁਤਾਬਿਕ ਅਜੀਤ ਅਗਰਕਰ (ਚੇਅਰਪਰਸਨ), ਸ਼ਿਵ ਸੁੰਦਰ ਦਾਸ, ਸੁਬਰਤੋ ਬੈਨਰਜੀ, ਸਲਿਲ ਅੰਕੋਲਾ, ਸ਼੍ਰੀਧਰਨ ਸ਼ਰਥ ਬਕਾਇਆ ਮੈਂਬਰ ਹੋਣਗੇ।
ਅਗਰਕਰ ਭਾਰਤੀ ਇੱਕ ਰੋਜ਼ਾ ਕ੍ਰਿਕਟ ਦੇ ਇਤਿਹਾਸ ‘ਚ ਸਭ ਤੋਂ ਵੱਧ ਸਨਮਾਨਿਤ ਖਿਡਾਰੀਆਂ ‘ਚੋਂ ਇੱਕ ਰਿਹਾ ਹੈ। ਉਸ ਨੇ 191 ਤੋਂ ਵੱਧ ਮੈਚ ਖੇਡੇ ਹਨ, ਅਤੇ 5.07 ਦੀ ਇਕੌਨਮੀ ਨਾਲ 288 ਵਿਕਟਾਂ ਹਾਸਿਲ ਕੀਤੀਆਂ ਹਨ। ਟੈੱਸਟ ਫ਼ੌਰਮੈਟ ‘ਚ ਅਗਰਕਰ ਨੇ 26 ਮੈਚਾਂ ‘ਚ 3.39 ਦੀ ਇਕੌਨਮੀ ਨਾਲ 58 ਵਿਕਟਾਂ ਹਾਸਿਲ ਕੀਤੀਆਂ ਸਨ। ਇੰਡੀਅਨ ਪ੍ਰੀਮੀਅਰ ਲੀਗ (IPLL) ‘ਚ, ਅਗਰਕਰ ਦਿੱਲੀ ਡੇਅਰਡੈਵਿਲਜ਼ (ਹੁਣ ਦਿੱਲੀ ਕੈਪੀਟਲਜ਼) ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ ਲਈ ਖੇਡ ਚੁੱਕੈ। ਉਸ ਨੇ 42 ਮੈਚ ਖੇਡੇ ਅਤੇ 8.83 ਦੀ ਇਕੌਨਮੀ ਨਾਲ 29 ਵਿਕਟਾਂ ਲਈਆਂ।
ਅਗਰਕਰ ਨੇ ਗੇਂਦ ਨਾਲ ਆਪਣੇ ਹੁਨਰ ਦੇ ਨਾਲ-ਨਾਲ ਬੱਲੇ ਨਾਲ ਵੀ ਕੁੱਝ ਯਾਦਗਾਰ ਪਾਰੀਆਂ ਖੇਡੀਆਂ ਸਨ। ਬੱਲੇ ਨਾਲ ਉਸ ਦੇ ਅੰਤਰਰਾਸ਼ਟਰੀ ਕਰੀਅਰ ਦਾ ਸਭ ਤੋਂ ਵੱਡਾ ਪਲ 2002 ‘ਚ ਆਇਆ ਸੀ ਜਦੋਂ ਉਸ ਨੇ ਲੌਰਡਜ਼ ‘ਚ ਇੰਗਲੈਂਡ ਖ਼ਿਲਾਫ਼ ਸੈਂਕੜਾ ਲਗਾਇਆ ਸੀ। ਇਸ ਦਮਦਾਰ ਪਾਰੀ ਨਾਲ ਉਸ ਦਾ ਨਾਂ ਹੁਣ ਲੌਰਡਜ਼ ਔਨਰ ਬੋਰਡ ‘ਤੇ ਦਰਜ ਹੈ। ਉਸ ਨੇ ਵਨਡੇ ‘ਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਬਣਾਉਣ ਦਾ ਰਿਕਾਰਡ ਵੀ ਤੋੜਿਆ ਸੀ। ਅਗਰਕਰ ਨੇ 2000 ‘ਚ ਜ਼ਿੰਬਾਬਵੇ ਦੇ ਖ਼ਿਲਾਫ਼ ਅੱਠਵੇਂ ਨੰਬਰ ‘ਤੇ ਬੱਲੇਬਾਜ਼ੀ ਕਰਦੇ ਹੋਏ ਅਜੇਤੂ 67 (27) * ਦੀ ਪਾਰੀ ਖੇਡੀ ਸੀ। ਉਸ ਨੇ ਵਨਡੇ ਫ਼ੌਰਮੈਟ ‘ਚ ਸਭ ਤੋਂ ਤੇਜ਼ 50 ਵਿਕਟਾਂ ਲੈਣ ਦੇ ਆਸਟਰੇਲੀਆ ਦੇ ਤੇਜ਼ ਗੇਂਦਬਾਜ਼ ਡੈਨਿਸ ਲਿਲੀ ਦੇ ਰਿਕਾਰਡ ਨੂੰ ਵੀ ਤੋੜਿਆ ਸੀ। ਲਿਲੀ ਨੇ 24 ਮੈਚਾਂ ‘ਚ ਇਹ ਕਮਾਲ ਦਾ ਕਾਰਨਾਮਾ ਕੀਤਾ ਸੀ, ਪਰ ਅਗਰਕਰ ਆਪਣੇ 23ਵੇਂ ਇੱਕ ਰੋਜ਼ਾ ਮੈਚ ‘ਚ ਲਿਲੀ ਦਾ ਰਿਕਾਰਡ ਤੋੜਨ ‘ਚ ਕਾਮਯਾਬ ਰਿਹਾ। ਭਾਰਤੀ ਤੇਜ਼ ਗੇਂਦਬਾਜ਼ ਨੇ ਇਹ ਰਿਕਾਰਡ ਲਗਭਗ ਇੱਕ ਦਹਾਕੇ ਤਕ ਕਾਇਮ ਰੱਖਿਆ, ਪਰ 2009 ‘ਚ ਸ਼੍ਰੀ ਲੰਕਾ ਦੇ ਸਪਿਨਰ ਅਜੰਤਾ ਮੈਂਡਿਸ ਨੇ ਆਪਣੇ 19ਵੇਂ ਵਨਡੇ ‘ਚ ਇਹ ਉਪਲਬਧੀ ਹਾਸਿਲ ਕਰ ਕੇ ਉਸ ਨੂੰ ਪਛਾੜ ਦਿੱਤਾ।
