ਰਾਓਰਕੇਲਾ: ਭਾਰਤ FIH ਪ੍ਰੋ ਲੀਗ ‘ਚ ਆਪਣਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਰੱਖਦੇ ਹੋਏ ਵਿਸ਼ਵ ਚੈਂਪੀਅਨ ਜਰਮਨੀ ਨੂੰ 6-3 ਨਾਲ ਹਰਾ ਕੇ ਅੰਕ ਸੂਚੀ ਵਿੱਚ ਚੋਟੀ ‘ਤੇ ਪਹੁੰਚ ਗਿਆ ਹੈ। ਭਾਰਤ ਦੀ ਜਰਮਨੀ ਵਿਰੁੱਧ ਤਿੰਨ ਦਿਨਾਂ ‘ਚ ਇਹ ਦੂਜੀ ਜਿੱਤ ਹੈ, ਅਤੇ ਇਸ ਜਿੱਤ ਦੀ ਬਦੌਲਤ ਹਰਮਨਪ੍ਰੀਤ ਸਿੰਘ ਦੀ ਅਗਵਾਈ ਵਾਲੀ ਟੀਮ ਸੱਤ ਮੈਚਾਂ ਵਿੱਚੋਂ 17 ਅੰਕਾਂ ਦੇ ਨਾਲ ਅੰਕ ਸੂਚੀ ‘ਚ ਚੋਟੀ ‘ਤੇ ਪਹੁੰਚ ਗਈ ਹੈ। ਸਪੇਨ ਦੇ ਵੀ 17 ਅੰਕ ਹਨ ਪਰ ਬਿਹਤਰ ਗੋਲ ਫ਼ਰਕ ਦੇ ਕਾਰਨ ਭਾਰਤ ਚੋਟੀ ‘ਤੇ ਹੈ।
ਟੌਮ ਗ੍ਰੈਮਬੁਸ਼ ਨੇ ਤੀਜੇ ਹੀ ਮਿੰਟ ‘ਚ ਇੱਕ ਪੈਨਲਟੀ ਕੌਰਨਰ ਨੂੰ ਗੋਲ ਵਿੱਚ ਬਦਲ ਕੇ ਜਰਮਨੀ ਨੂੰ ਬੜ੍ਹਤ ਦਿਵਾ ਦਿੱਤੀ। ਆਸਟਰੇਲੀਆ ਵਿਰੁੱਧ 5-4 ਨਾਲ ਰੋਮਾਂਚਕ ਜਿੱਤ ਦਰਜ ਕਰਨ ਵਾਲੇ ਭਾਰਤ ਨੇ ਹਾਲਾਂਕਿ 21ਵੇਂ ਮਿੰਟ ਵਿੱਚ ਪੈਨਲਟੀ ਕੌਰਨਰ ‘ਤੇ ਜੁਗਰਾਜ ਸਿੰਘ ਦੇ ਗੋਲ ਨਾਲ ਬਰਾਬਰੀ ਹਾਸਿਲ ਕਰ ਲਈ। ਟੀਮ ਲਈ ਅਭਿਸ਼ੇਕ (22ਵੇਂ ਤੇ 51ਵੇਂ ਮਿੰਟ) ਅਤੇ ਸੇਲਵਮ ਕਾਰਤੀ (24ਵੇਂ ਤੇ 26ਵੇਂ ਮਿੰਟ) ਨੇ 2-2 ਗੋਲ ਕੀਤੇ ਜਦਕਿ ਇੱਕ ਹੋਰ ਗੋਲ ਹਰਮਨਪ੍ਰੀਤ (26ਵੇਂ ਮਿੰਟ) ਨੇ ਕੀਤਾ ਜਿਸ ਨਾਲ ਭਾਰਤ ਨੇ ਲਗਾਤਾਰ ਤੀਜੀ ਜਿੱਤ ਦਰਜ ਕੀਤੀ। ਜਰਮਨੀ ਲਈ ਦੋ ਹੋਰ ਗੋਲ ਗੌਂਜ਼ੈਲੋ ਪੇਇਲੌਟ (23ਵੇਂ ਮਿੰਟ) ਅਤੇ ਮਾਲਟੇ ਹੇਲਵਿਗ (31ਵੇਂ ਮਿੰਟ) ਨੇ ਕੀਤੇ। ਭਾਰਤ ਨੇ ਇਸ ਤੋਂ ਪਹਿਲਾਂ ਪਿਛਲੇ ਦੋ ਮੈਚਾਂ ‘ਚ ਜਰਮਨੀ ਅਤੇ ਆਸਟਰੇਲੀਆ ਨੂੰ ਹਰਾਇਆ ਸੀ।
