ਨਵੀਂ ਦਿੱਲੀ: ਭਾਰਤ ਅਤੇ ਆਸਟ੍ਰੇਲੀਆ ਵਿਚਾਲੇ ਚਾਰ ਟੈੱਸਟ ਮੈਚਾਂ ਦੀ ਸੀਰੀਜ਼ ਦਾ ਪਹਿਲਾ ਮੈਚ ਨਾਗਪੁਰ ‘ਚ ਖੇਡਿਆ ਜਾਵੇਗਾ। ਪਹਿਲਾ ਟੈੱਸਟ ਮੈਚ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਆਸਟ੍ਰੇਲੀਆਈ ਬੱਲੇਬਾਜ਼ਾਂ ‘ਚ ਆਰ.ਅਸ਼ਵਿਨ ਦਾ ਡਰ ਸਮਾ ਗਿਆ ਹੈ। ਆਸਟ੍ਰੇਲੀਆਈ ਸਲਾਮੀ ਬੱਲੇਬਾਜ਼ ਉਸਮਾਨ ਖ਼ਵਾਜਾ ਨੇ ਕਿਹਾ ਕਿ ਰਵੀਚੰਦਰਨ ਅਸ਼ਵਿਨ ਨੂੰ ਟਰਨਿੰਗ ਪਿੱਚ ‘ਤੇ ਖੇਡਣਾ ਮੁਸ਼ਕਿਲ ਚੁਣੌਤੀ ਹੈ।
ਜ਼ਿਕਰਯੋਗ ਹੈ ਕਿ ਵੀਜ਼ਾ ਦੇਰੀ ਕਾਰਨ ਆਪਣੇ ਸਾਥੀਆਂ ਤੋਂ ਬਾਅਦ ਭਾਰਤ ਪੁੱਜੇ ਉਸਮਾਨ ਖਵਾਜਾ ਬੱਲੇਬਾਜ਼ ਡੇਵਿਡ ਵਾਰਨਰ ਨਾਲ ਬੱਲੇਬਾਜ਼ੀ ਦੀ ਸ਼ੁਰੂਆਤ ਕਰਨਗੇ। ਖ਼ਵਾਜਾ ਨੇ ਭਾਰਤ ‘ਚ ਸੀਮਿਤ ਓਵਰਾਂ ਦੀ ਕ੍ਰਿਕਟ ਖੇਡੀ ਹੈ, ਪਰ ਆਖਿਰਕਾਰ 2013 ਅਤੇ 2017 ‘ਚ ਟੈੱਸਟ ਟੀਮ ਦਾ ਹਿੱਸਾ ਰਹਿਣ ਤੋਂ ਬਾਅਦ ਲੰਬੇ ਸਮੇਂ ਬਾਅਦ ਭਾਰਤ ‘ਚ ਖੇਡਣ ਦਾ ਮੌਕਾ ਮਿਲੇਗਾ। ਹਾਲ ਹੀ ‘ਚ ਇਸ ਆਸਟ੍ਰੇਲੀਆਈ ਬੱਲੇਬਾਜ਼ ਨੂੰ ਟੈੱਸਟ ਕ੍ਰਿਕਟਰ ਔਫ਼ ਦਾ ਯੀਅਰ ਚੁਣਿਆ ਗਿਆ ਹੈ।
ਮੈਚ ਤੋਂ ਪਹਿਲਾਂ ਉਸਮਾਨ ਖ਼ਵਾਜਾ ਨੇ ਕਿਹਾ, ”ਯਕੀਨਨ ਇੱਕ ਵੱਖਰਾ ਅਨੁਭਵ ਹੈ। ਇਸ ਖੇਡ ‘ਚ ਕੋਈ ਗਾਰੰਟੀ ਨਹੀਂ, ਪਰ ਘੱਟੋ-ਘੱਟ ਬੱਲੇਬਾਜ਼ੀ ‘ਚ ਥੋੜ੍ਹੀ ਹੋਰ ਪਰਿਪੱਕਤਾ ਤੇ ਗੇਂਦਬਾਜ਼ੀ ‘ਚ ਵਧੇਰੇ ਡੂੰਘਾਈ ਹੈ। ਅੱਠ ਖੱਬੇ ਹੱਥ ਦੇ ਬੱਲੇਬਾਜ਼ਾਂ ਨਾਲ ਭਰੀ ਟੀਮ ਆਸਟ੍ਰੇਲੀਆ ਅਸ਼ਵਿਨ ਦੇ ਖ਼ਤਰੇ ਨਾਲ ਨਜਿੱਠਣ ਲਈ ਯੋਜਨਾ ਤਿਆਰ ਕਰ ਰਿਹਾ ਹੈ। ਇਸ ਸਬੰਧ ‘ਚ ਉਸਮਾਨ ਖ਼ਵਾਜਾ ਨੇ ਕਿਹਾ, ”ਅਸ਼ਵਿਨ ਇੱਕ ਗੰਨ ਹਨ। ਉਹ ਵਿਕਟਾਂ ਲੈਣ ‘ਚ ਬਹੁਤ ਹੁਨਰਬਾਜ਼ ਹੈ। ਉਸ ਕੋਲ ਗੇਂਦਬਾਜ਼ੀ ‘ਚ ਬਹੁਤ ਸਾਰੇ ਵਿਕਲਪ ਹਨ। ਉਹ ਕ੍ਰੀਜ਼ ਦੀ ਵੀ ਬਹੁਤ ਵਧੀਆ ਵਰਤੋਂ ਕਰਦੈ।”
”ਜੇਕਰ ਤੁਸੀਂ ਮੈਨੂੰ ਇਹੀ ਸਵਾਲ ਓਦੋਂ ਪੁੱਛਦੇ ਜਦੋਂ ਮੈਂ ਛੋਟਾ ਸੀ ਤਾਂ ਮੈਂ ਸ਼ਾਇਦ ਨਹੀਂ ਕਰ ਪਾਉਂਦਾ। ਬਹੁਤ ਸਾਰੀਆਂ ਚੀਜ਼ਾਂ ਦਾ ਜਵਾਬ ਦਿੰਦਾ ਕਿਉਂਕਿ ਮੈਂ ਅਸਲ ‘ਚ ਇਹ ਨਹੀਂ ਸਿੱਖ ਸਕਿਆ ਕਿ ਓਫ਼ ਸਪਿਨਰ ਕੀ ਕਰ ਰਹੇ ਹਨ, ਉਨ੍ਹਾਂ ਦਾ ਸਾਹਮਣਾ ਕਿਵੇਂ ਕਰਨਾ ਹੈ।”
ਜ਼ਿਕਰਯੋਗ ਹੈ ਕਿ ਆਸਟ੍ਰੇਲੀਆ 2004-05 ਤੋਂ ਬਾਅਦ ਭਾਰਤ ‘ਚ ਟੈੱਸਟ ਸੀਰੀਜ਼ ਜਿੱਤਣ ਦੀ ਕੋਸ਼ਿਸ਼ ਕਰੇਗਾ। ਇਸ ਦੇ ਨਾਲ ਹੀ ਭਾਰਤੀ ਦਰਸ਼ਕ ਚਾਰੇ ਮੈਚਾਂ ‘ਚ ਟਰਨਿੰਗ ਪਿੱਚਾਂ ਦੀ ਉਮੀਦ ਕਰ ਰਹੇ ਹਨ ਜਿਸ ਕਾਰਨ ਅਸ਼ਵਿਨ, ਅਕਸ਼ਰ ਪਟੇਲ ਅਤੇ ਰਵਿੰਦਰ ਜਡੇਜਾ ਦੀ ਤਿਕੜੀ ਨਵੀਂ ਗੇਂਦ ਨਾਲ ਕਾਫ਼ੀ ਘਾਤਕ ਸਾਬਿਤ ਹੋ ਸਕਦੀ ਹੈ।
