ਸ਼ਮੀ ਨੇ ਉਮਰਾਨ ਮਲਿਕ ਨੂੰ ਦਿੱਤੀ ਸਲਾਹ

ਰਾਏਪੁਰ: ਤੇਜ਼ ਗੇਂਦਬਾਜ਼ ਮੁਹੰਮਦ ਸ਼ਮੀ ਦਾ ਮੰਨਣਾ ਹੈ ਕਿ ਉਮਰਾਨ ਮਲਿਕ ਦਾ ਆਪਣੀ ਰਫ਼ਤਾਰ ਕਾਰਨ ਇੱਕ ਸ਼ਾਨਦਾਰ ਭਵਿੱਖ ਹੈ ਅਤੇ ਜੇਕਰ ਨੌਜਵਾਨ ਤੇਜ਼ ਗੇਂਦਬਾਜ਼ ਆਪਣੀ ਲਾਈਨ ਅਤੇ ਲੈਂਥ ‘ਤੇ ਕੰਮ ਕਰਦਾ ਹੈ ਤਾਂ ਦੁਨੀਆਂ ‘ਤੇ ਰਾਜ ਕਰ ਸਕਦਾ ਹੈ। ਜੰਮੂ-ਕਸ਼ਮੀਰ ਦੇ ਤੇਜ਼ ਗੇਂਦਬਾਜ਼ ਉਮਰਾਨ ਨੇ ਆਪਣੀ ਰਫ਼ਤਾਰ ਨਾਲ ਪ੍ਰਭਾਵਿਤ ਕੀਤਾ ਹੈ।
ਉਹ ਲਗਾਤਾਰ 150 ਕਿਲੋਮੀਟਰ ਦੀ ਰਫ਼ਤਾਰ ਨਾਲ ਗੇਂਦਬਾਜ਼ੀ ਕਰਦਾ ਹੈ ਪਰ ਲਾਈਨ ਅਤੇ ਲੈਂਥ ਨਾਲ ਜੂਝਦਾ ਹੈ। ਸ਼ਮੀ ਨੇ ਉਮਰਾਨ ਨੂੰ ਕਿਹਾ, ”ਮੈਂ ਤੁਹਾਨੂੰ ਸਿਰਫ਼ ਇੱਕ ਸਲਾਹ ਦੇਣਾ ਚਾਹੁੰਦਾ ਹਾਂ। ਮੈਨੂੰ ਨਹੀਂ ਲੱਗਦਾ ਕਿ ਤੁਹਾਡੀ ਜੋ ਰਫ਼ਤਾਰ ਹੈ ਉਸ ਨੂੰ ਖੇਡਣਾ ਆਸਾਨ ਹੈ। ਸਾਨੂੰ ਸਿਰਫ਼ ਲਾਈਨ ਅਤੇ ਲੈਂਥ ‘ਤੇ ਕੰਮ ਕਰਨ ਦੀ ਜ਼ਰੂਰਤ ਹੈ। ਜੇਕਰ ਅਸੀਂ ਇਸ ਨੂੰ ਨਿਯੰਤਰਿਤ ਕਰ ਸਕਦੇ ਹਾਂ ਤਾਂ ਅਸੀਂ ਦੁਨੀਆਂ ‘ਤੇ ਰਾਜ ਕਰ ਸਕਦੇ ਹਾਂ।”
ਇਨ੍ਹਾਂ ਦੋ ਤੇਜ਼ ਗੇਂਦਬਾਜ਼ਾਂ ਵਿਚਾਲੇ ਗੱਲਬਾਤ ਦੀ ਵੀਡੀਓ BCCI TV ‘ਤੇ ਪੋਸਟ ਕੀਤਾ ਗਿਆ ਹੈ। ਸ਼ਮੀ ਨੇ ਕਿਹਾ, ”ਤੁਹਾਡੇ ਕੋਲ ਬਹੁਤ ਤਾਕਤ ਹੈ ਅਤੇ ਤੁਹਾਡਾ ਭਵਿੱਖ ਸ਼ਾਨਦਾਰ ਹੈ। ਭਵਿੱਖ ਲਈ ਸ਼ੁਭਕਾਮਨਾਵਾਂ। ਉਮੀਦ ਹੈ ਕਿ ਤੁਸੀਂ ਆਪਣੀ ਚੰਗੀ ਕਾਰਗੁਜ਼ਾਰੀ ਜਾਰੀ ਰੱਖੋਗੇ।”
ਉਮਰਾਨ ਨੇ ਸ਼ਮੀ ਨੂੰ ਪੁੱਛਿਆ ਕਿ ਉਹ ਹਰ ਮੈਚ ‘ਚ ਇੰਨਾ ਸ਼ਾਂਤ ਅਤੇ ਖ਼ੁਸ਼ ਕਿਵੇਂ ਰਹਿੰਦਾ ਹੈ। ਉਸ ਨੇ ਕਿਹਾ, ”ਜਦੋਂ ਤੁਸੀਂ ਦੇਸ਼ ਲਈ ਖੇਡ ਰਹੇ ਹੋ ਤਾਂ ਤੁਹਾਨੂੰ ਆਪਣੇ ਉੱਤੇ ਦਬਾਅ ਨਹੀਂ ਪਾਉਣਾ ਚਾਹੀਦਾ। ਤੁਹਾਨੂੰ ਆਪਣੇ ਹੁਨਰ ‘ਤੇ ਭਰੋਸਾ ਕਰਨਾ ਚਾਹੀਦਾ ਹੈ।” ਸ਼ਮੀ ਨੇ ਕਿਹਾ, ”ਜਦੋਂ ਤੁਸੀਂ ਸ਼ਾਂਤ ਰਹਿੰਦੇ ਹੋ ਅਤੇ ਆਪਣੇ ਹੁਨਰ ‘ਤੇ ਭਰੋਸਾ ਰਖਦੇ ਹੋ ਤਾਂ ਤੁਹਾਡੇ ਕੋਲ ਆਪਣੀ ਰਣਨੀਤੀ ਦੇ ਅਨੁਸਾਰ ਜਾਣ ਦਾ ਚੰਗਾ ਮੌਕਾ ਹੁੰਦਾ ਹੈ। ਆਪਣੀ ਮੁਸਕੁਰਾਹਟ ਬਣਾਏ ਰੱਖੋ ਕਿਉਂਕਿ ਇਹ ਸੀਮਿਤ ਓਵਰਜ਼ ਕ੍ਰਿਕਟ ਹੈ ਜਿੱਥੇ ਕਿਸੇ ਦੀ ਵੀ ਧੁਨਾਈ ਹੋ ਸਕਦੀ ਹੈ, ਪਰ ਆਪਣੇ ਆਪ ‘ਤੇ ਭਰੋਸਾ ਰਖੋ ਅਤੇ ਪਿੱਚ ਵਲ ਧਿਆਨ ਦਿਓ ਅਤੇ ਉਸੇ ਅਨੁਸਾਰ ਗੇਂਦਬਾਜ਼ੀ ਕਰੋ।”