ਮੁੰਬਈ: ਟੀਮ ਇੰਡੀਆ ਦੀ T-20 ਵਿਸ਼ਵ ਕੱਪ ਮੁਹਿੰਮ ਦੇ ਨਿਰਾਸ਼ਾਜਨਕ ਅੰਤ ਤੋਂ ਬਾਅਦ ਸਭ ਦੀਆਂ ਨਜ਼ਰਾਂ ਹੁਣ IPL 2023 ‘ਤੇ ਟਿਕੀਆਂ ਹਨ। IPL ਟੀਮਾਂ ਨੇ ਰਿਟੈਨਸ਼ਨ ਲਿਸਟ ਜਾਰੀ ਕਰ ਦਿੱਤੀ ਹੈ ਅਤੇ ਕਈ ਟੀਮਾਂ ਨੇ ਵੱਡੇ ਖਿਡਾਰੀਆਂ ਨੂੰ ਵੀ ਰਿਲੀਜ਼ ਕਰ ਦਿੱਤਾ ਹੈ। ਰਿਟੈਨਸ਼ਨ ਪ੍ਰਕਿਰਿਆ ਪੂਰੀ ਹੋਣ ਤੋਂ ਬਾਅਦ, ਆਓ ਉਨ੍ਹਾਂ ਖਿਡਾਰੀਆਂ ‘ਤੇ ਨਜ਼ਰ ਮਾਰੀਏ ਜੋ IPL 2022 ‘ਚ ਸਭ ਤੋਂ ਵੱਧ ਵਿੱਕੇ ਸਨ ਪਰ ਇਸ ਸਾਲ ਟੀਮਾਂ ਨੇ ਉਨ੍ਹਾਂ ਨੂੰ ਰਿਲੀਜ਼ ਕਰ ਦਿੱਤਾ ਹੈ:
ਕੇਨ ਵਿਲੀਅਮਸਨ: ਸਨਰਾਈਜ਼ਰਸ ਹੈਦਰਾਬਾਦ ਵਲੋਂ ਰਿਲੀਜ਼ ਕੀਤੇ ਗਏ ਸਭ ਤੋਂ ਮਹਿੰਗੇ ਖਿਡਾਰੀਆਂ ਦੀ ਸੂਚੀ ਪਹਿਲਾ ਨਾਂ ਕੇਨ ਵਿਲੀਅਮਸਨ ਦਾ ਸੀ। ਉਸ ਨੂੰ ਟੀਮ ਨੇ 14 ਕਰੋੜ ਰੁਪਏ ‘ਚ ਬਰਕਰਾਰ ਰੱਖਿਆ ਸੀ ਹਾਲਾਂਕਿ ਪਿਛਲੇ ਸਾਲ 5 ਜਿੱਤਾਂ ਦੀ ਮਜ਼ਬੂਤ ਸ਼ੁਰੂਆਤ ਦੇ ਬਾਵਜੂਦ ਅੱਠਵੇਂ ਸਥਾਨ ‘ਤੇ ਰਹਿਣ ਤੋਂ ਬਾਅਦ ਹੈਦਰਾਬਾਦ ਨੇ ਕਈ ਸਖ਼ਤ ਫ਼ੈਸਲੇ ਲਏ ਅਤੇ ਵਿਲੀਅਮਸਨ ਨੂੰ ਰਿਲੀਜ਼ ਕਰ ਦਿੱਤਾ। ਹੁਣ ਫ਼ਰੈਂਚਾਇਜ਼ੀ ਅਜਿਹੇ ਖਿਡਾਰੀ ਦੀ ਭਾਲ ਕਰ ਰਹੀ ਹੈ ਜੋ ਇਸ ਭੂਮਿਕਾ ਵਿੱਚ ਚੰਗੀ ਤਰ੍ਹਾਂ ਫ਼ਿੱਟ ਹੋ ਸਕੇ।
ਮਯੰਕ ਅਗਰਵਾਲ: ਪੰਜਾਬ ਕਿੰਗਜ਼ ਨੇ ਮਯੰਕ ਅਗਰਵਾਲ ਤੋਂ ਵੱਖ ਹੋਣ ਦਾ ਫ਼ੈਸਲਾ ਕੀਤਾ ਹੈ। ਉਨ੍ਹਾਂ ਨੇ ਨਿਲਾਮੀ ਤੋਂ ਪਹਿਲਾਂ ਉਸ ਖਿਡਾਰੀ ਨੂੰ ਛੱਡ ਦਿੱਤਾ ਜਿਸ ਨੂੰ ਵਿਲੀਅਮਸਨ ਦੇ ਬਰਾਬਰ 14 ਕਰੋੜ ਰੁਪਏ ਮਿਲੇ ਸਨ, ਪਰ ਉਹ ਟੀਮ ਮੈਨੇਜਮੈਂਟ ਦੀਆਂ ਉਮੀਦਾਂ ‘ਤੇ ਖਰਾ ਨਹੀਂ ਉਤਰ ਸਕਿਆ। ਪਿਛਲੇ ਸੈਸ਼ਨ ‘ਚ ਮਜ਼ਬੂਤ ਟੀਮ ਹੋਣ ਦੇ ਬਾਵਜੂਦ ਸਾਬਕਾ ਕਪਤਾਨ ਮਯੰਕ ਅਗਰਵਾਲ ਦੀ ਟੀਮ ਅੰਕ ਸੂਚੀ ‘ਚ ਛੇਵੇਂ ਸਥਾਨ ‘ਤੇ ਰਹੀ। ਬੈਂਗਲੌਰ ਦੇ 31 ਸਾਲਾ ਖਿਡਾਰੀ ਨੇ 13 ਪਾਰੀਆਂ ‘ਚ 16.33 ਦੀ ਔਸਤ ਨਾਲ ਸਿਰਫ਼ 196 ਦੌੜਾਂ ਹੀ ਬਣਾਈਆਂ ਸਨ।
ਨਿਕੋਲਸ ਪੂਰਨ: ਸਨਰਾਈਜ਼ਰਜ਼ ਨੇ ਇੱਕ ਹੋਰ ਖਿਡਾਰੀ ਨਿਕੋਲਸ ਪੂਰਨ ਨੂੰ ਵੀ ਟੀਮ ਤੋਂ ਬਾਹਰ ਕਰ ਦਿੱਤਾ ਹੈ। ਪੂਰਨ ਨੂੰ 10.75 ਕਰੋੜ ਰੁਪਏ ‘ਚ ਖ਼ਰੀਦਿਆ ਗਿਆ ਸੀ ਜਿਸ ਨਾਲ ਉਹ 2023 ਦੀ ਨਿਲਾਮੀ ਤੋਂ ਪਹਿਲਾਂ ਰਿਲੀਜ਼ ਹੋਣ ਵਾਲਾ ਤੀਜਾ ਸਭ ਤੋਂ ਮਹਿੰਗਾ ਖਿਡਾਰੀ ਬਣ ਗਿਆ ਹੈ। ਪੂਰਨ IPL ਵਿੱਚ ਖ਼ਰੀਦੇ ਗਏ ਵੈੱਸਟ ਇੰਡੀਜ਼ ਦੇ ਹੁਣ ਤਕ ਦੇ ਸਭ ਤੋਂ ਮਹਿੰਗਾ ਖਿਡਾਰੀ ਸੀ, ਪਰ ਉਹ ਅਸਫ਼ਲ ਸਾਬਿਤ ਹੋਇਆ
ਜੇਸਨ ਹੋਲਡਰ: ਲਖਨਊ ਸੁਪਰ ਜੋਇੰਟਸ ਨੇ ਜੇਸਨ ਹੋਲਡਰ ਨੂੰ ਟੀਮ ਤੋਂ ਬਾਹਰ ਕਰ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਟੀਮ ਨੇ ਉਸ ਨੂੰ 8.75 ਕਰੋੜ ਰੁਪਏ ‘ਚ ਖ਼ਰੀਦਿਆ ਸੀ।
ਰੋਮਾਰੀਓ ਸ਼ੈਫ਼ਰਡ: ਇਸ ਖਿਡਾਰੀ ਨੂੰ ਸਨਰਾਈਜ਼ਰਸ ਹੈਦਰਾਬਾਦ ਨੇ 2022 ਦੀ ਮੇਗਾ-ਔਕਸ਼ਨ ‘ਚ 7.75 ਕਰੋੜ ਰੁਪਏ ‘ਚ ਖ਼ਰੀਦਿਆ ਸੀ। ਤੇਜ਼ ਗੇਂਦਬਾਜ਼ ਦੀ ਭੂਮਿਕਾ ਨਿਭਾਉਣ ਦੇ ਨਾਲ-ਨਾਲ ਉਹ ਹੇਠਲੇ ਕ੍ਰਮ ‘ਚ ਹਾਰਡ-ਹਿੱਟਰ ਬੱਲੇਬਾਜ਼ ਵੀ ਹੈ। ਹਾਲਾਂਕਿ ਇਹ ਖਿਡਾਰੀ ਹੈਦਰਾਬਾਦ ਦੀ ਟੀਮ ਲਈ ਕੁੱਝ ਖ਼ਾਸ ਨਹੀਂ ਕਰ ਸਕਿਆ ਜਿਸ ਕਾਰਨ ਉਸ ਨੂੰ ਟੀਮ ਤੋਂ ਬਾਹਰ ਕਰ ਦਿੱਤਾ ਗਿਆ ਹੈ।
