ਅਸ਼ਵਿਨ ਹਮੇਸ਼ਾ ਹਮਲਾਵਰ ਬਦਲ ਹੈ – ਰੋਹਿਤ

ਕੋਲਕਾਤਾ – ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਨੇ ਕਿਹਾ ਕਿ T-20 ਅੰਤਰਾਸ਼ਟਰੀ ਮੈਚਾਂ ਦੇ ਵਿਚਕਾਰਲੇ ਓਵਰਾਂ ‘ਚ ਜਦੋਂ ਟੀਮ ਨੂੰ ਵਿਕਟਾਂ ਦੀ ਲੋੜ ਹੁੰਦੀ ਹੈ ਤਾਂ ਔਫ਼ ਸਪਿਨਰ ਰਵੀਚੰਦਰਨ ਅਸ਼ਵਿਨ ਹਮੇਸ਼ਾ ਇੱਕ ਹਮਲਾਵਰ ਬਦਲ ਹੁੰਦੇ ਹਨ। T-20 ਦੇ ਨਵੇਂ ਕਪਤਾਨ ਰੋਹਿਤ ਨੇ ਨਿਊ ਜ਼ੀਲੈਂਡ ਖ਼ਿਲਾਫ਼ 3-0 ਨਾਲ ਜਿੱਤ ‘ਚ ਟੀਮ ਦੀ ਗੇਂਦਬਾਜ਼ੀ ਨੂੰ ਸਭ ਤੋਂ ਵੱਡਾ ਹਾਂ-ਪੱਖੀ ਪਹਿਲੂ ਕਰਾਰ ਦਿੱਤਾ।
ਇਸ ਮਹੀਨੇ ਦੇ ਸ਼ੁਰੂ ‘ਚ T-20 ਵਿਸ਼ਵ ਕੱਪ ‘ਚ ਚਾਰ ਸਾਲ ਬਾਅਦ ਸੀਮਿਤ ਓਵਰਾਂ ਦੀ ਟੀਮ ‘ਚ ਵਾਪਸੀ ਕਰਨ ਵਾਲੇ 35 ਸਾਲਾ ਅਸ਼ਵਿਨ ਨੇ ਨਿਊ ਜ਼ੀਲੈਂਡ ਖ਼ਿਲਾਫ਼ ਤਿੰਨ ਮੈਚਾਂ ਦੀ ਸੀਰੀਜ਼ ‘ਚ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਕੀਤਾ ਅਤੇ ਵਿਚਲੇ ਓਵਰਾਂ ‘ਚ ਦੌੜਾਂ ‘ਤੇ ਲਗਾਮ ਲਾਉਣ ਦੇ ਨਾਲ-ਨਾਲ ਵਿਕਟਾਂ ਵੀ ਹਾਸਿਲ ਕੀਤੀਆਂ। ਰੋਹਿਤ ਨੇ ਕਿਹਾ, ”ਉਹ ਕਿਸੇ ਵੀ ਕਪਤਾਨ ਲਈ ਹਮੇਸ਼ਾ ਹਮਲਾਵਰ ਬਦਲ ਹੈ। ਜਦੋਂ ਤੁਹਾਡੇ ਕੋਲ ਉਸ ਵਰਗਾ ਗੇਂਦਬਾਜ਼ ਟੀਮ ‘ਚ ਹੁੰਦਾ ਹੈ ਤਾਂ ਇਸ ਨਾਲ ਤੁਹਾਨੂੰ ਵਿਚਲੇ ਓਵਰਾਂ ‘ਚ ਵਿਕਟਾਂ ਹਾਸਿਲ ਕਰਨ ਦਾ ਮੌਕਾ ਮਿਲਦਾ ਹੈ ਅਤੇ ਅਸੀਂ ਜਾਣਦੇ ਹਾਂ ਕਿ ਇਹ ਪੜਾਅ ਕਿੰਨਾ ਮਹੱਤਵਪੂਰਨ ਹੁੰਦਾ ਹੈ। ਦੁਬਈ ‘ਚ ਖੇਡਣ ਤੋਂ ਬਾਅਦ ਹੀ ਉਸ ਨੇ ਸ਼ਾਨਦਾਰ ਵਾਪਸੀ ਕੀਤੀ ਹੈ। ਉਹ ਬਿਹਤਰੀਨ ਗੇਂਦਬਾਜ਼ ਹੈ ਅਤੇ ਅਸੀਂ ਸਾਰੇ ਇਹ ਚੰਗੀ ਤਰ੍ਹਾਂ ਨਾਲ ਜਾਣਦੇ ਹਾਂ।”