ਨਵੀਂ ਦਿੱਲੀ – ਕੌਮਾਂਤਰੀ ਕ੍ਰਿਕਟ ਪਰਿਸ਼ਦ (ICC) ਵਲੋਂ ਅਗਲੇ ਸਾਲ ਆਸਟਰੇਲੀਆ ‘ਚ ਹੋਣ ਵਾਲੇ T-20 ਵਿਸ਼ਵ ਕੱਪ ਲਈ ਸੱਤ ਸ਼ਹਿਰਾਂ ਦਾ ਐਲਾਨ ਕੀਤਾ ਗਿਆ ਹੈ। ਅਗਲੇ ਸਾਲ 16 ਅਕਤੂਬਰ ਤੋਂ 13 ਨਵੰਬਰ ਤਕ ਹੋਣ ਵਾਲੇ ਇਸ ਟੂਰਨਾਮੈਂਟ ‘ਚ ਐਡੀਲੇਡ, ਬ੍ਰਿਸਬੇਨ, ਜੀਲੈਂਗ, ਹੋਬਾਰਟ, ਮੈਲਬਰਨ, ਪਰਥ ਅਤੇ ਸਿਡਨੀ ‘ਚ ਕੁੱਲ 45 ਮੈਚ ਖੇਡੇ ਜਾਣਗੇ। ICC ਪੁਰਸ਼ T-20 ਵਿਸ਼ਵ ਕੱਪ 2022 ਦਾ ਫ਼ਾਈਨਲ 13 ਨਵੰਬਰ 2022 ਨੂੰ ਮੈਲਬਰਨ ਕ੍ਰਿਕਟ ਗਰਾਊਂਡ ‘ਚ ਹੋਵੇਗਾ।
ਸੈਮੀਫ਼ਾਈਨਲ ਸਿਡਨੀ ਕ੍ਰਿਕਟ ਗਰਾਊਂਡ ਅਤੇ ਐਡੀਲੇਡ ਓਵਲ ਵਿਖੇ ਕ੍ਰਮਵਾਰ 9 ਅਤੇ 10 ਨਵੰਬਰ ਨੂੰ ਹੋਣਗੇ। ਸਾਰੇ ਮੈਚ ਰਾਤ ਨੂੰ ਖੇਡੇ ਜਾਣਗੇ ਅਤੇ ਸਾਰੇ ਮੈਚਾਂ ‘ਚ ਵੱਡੀ ਗਿਣਤੀ ‘ਚ ਦਰਸ਼ਕਾਂ ਦੇ ਪਹੁੰਚਣ ਦੀ ਸੰਭਾਵਨਾ ਵੀ ਹੈ। ਜਿਨ੍ਹਾਂ ਦੇਸ਼ਾਂ ਨੇ ਸੁਪਰ 12 ਪੜਾਅ ਲਈ ਸਿੱਧੇ ਕੁਆਲੀਫ਼ਾਈ ਕੀਤਾ ਹੈ ਉਸ ‘ਚ ਅਫ਼ਗ਼ਾਨਿਸਤਾਨ, ਆਸਟਰੇਲੀਆ, ਬੰਗਲਾਦੇਸ਼, ਇੰਗਲੈਂਡ, ਭਾਰਤ, ਪਾਕਿਸਤਾਨ, ਨਿਊ ਜ਼ੀਲੈਂਡ ਅਤੇ ਦੱਖਣੀ ਅਫ਼ਰੀਕਾ ਦੀਆਂ ਟੀਮਾਂ ਸ਼ਾਮਿਲ ਹਨ। ਇਸ ਦੇ ਨਾਲ ਹੀ ਸ਼੍ਰੀ ਲੰਕਾ ਅਤੇ ਵੈੱਸਟ ਇੰਡੀਜ਼ ਵਰਗੀਆਂ ਟੀਮਾਂ ਨੂੰ ਰਾਊਂਡ ਵੰਨ ਦੇ ਜ਼ਰੀਏ ਸੁਪਰ 12 ‘ਚ ਜਗ੍ਹਾ ਬਣਾਉਣ ਦਾ ਮੌਕਾ ਮਿਲੇਗਾ। ਨਾਮੀਬੀਆ, ਸਕੌਟਲੈਂਡ, ਸ਼੍ਰੀ ਲੰਕਾ ਅਤੇ ਵੈੱਸਟ ਇੰਡੀਜ਼ ਰਾਊਂਡ ਵੰਨ ਦੇ ਮੈਚ ਖੇਡਣਗੇ। ਵਿਸ਼ਵ ਕੱਪ ‘ਚ ਕੁੱਲ 12 ਟੀਮਾਂ ਖੇਡਦੀਆਂ ਹਨ ਜਿਨ੍ਹਾਂ ‘ਚੋਂ 8 ਟੀਮਾਂ ਪਿੱਛਲੇ ਵਿਸ਼ਵ ਕੱਪ ਦੀਆਂ ਟੌਪ ਟੀਮਾਂ ਹੁੰਦੀਆਂ ਹਨ ਜਿਨ੍ਹਾਂ ਦੀ ਐਂਟਰੀ ਆਟੋਮੈਟਿਕ ਹੁੰਦੀ ਹੈ, ਬਾਕੀ ਦੀਆਂ ਚਾਰ ਹੋਰ ਟੀਮਾਂ ਦਾ ਐਲਾਨ ਰਾਊਂਡ ਵੰਨ ਵਿਚੋਂ ਨਿਕਲੀਆਂ ਟੌਪ ਦੋ ਟੀਮਾਂ ਹੋਣਗੀਆਂ। ਰਾਊਂਡ ਵੰਨਾ 2022 ਦੇ T-20 ਵਿਸ਼ਵ ਤੋਂ ਐਨ ਪਹਿਲਾਂ ਖੇਡਿਆ ਜਾਵੇਗਾ।
