ਨਵੀਂ ਦਿੱਲੀ – muqfibk ਵਿਸ਼ਵ ਕੱਪ 2021 ਤੋਂ ਬਾਅਦ ਖ਼ੁਦ ਨੂੰ ਤਰੋਤਾਜ਼ਾ ਕਰਨ ਲਈ ਵਰਤਮਾਨ ਸਮੇਂ ‘ਚ ਰੈੱਸਟ ‘ਤੇ ਚਲ ਰਿਹਾ ਭਾਰਤੀ ਵਨ-ਡੇ ਅਤੇ ਟੈੱਸਟ ਕ੍ਰਿਕਟ ਟੀਮ ਦਾ ਕਪਤਾਨ ਵਿਰਾਟ ਕੋਹਲੀ ਇੱਕ ਅਜੀਬ ਵਿਵਾਦ ਨੂੰ ਲੈ ਕੇ ਸੋਸ਼ਲ ਮੀਡੀਆ ਯੂਜ਼ਰਜ਼ ਦੇ ਨਿਸ਼ਾਨੇ ‘ਤੇ ਆ ਗਿਆ ਹੈ। ਦਰਅਸਲ ਕੋਹਲੀ ਦੀ ਮਾਲਕੀ ਵਾਲੀ ਰੈਸਟੋਰੈਂਟ ਚੇਨ ਵਨ8 ਕਮਿਊਨ ‘ਤੇ ਦੋਸ਼ ਹੈ ਕਿ ਉਹ ਆਪਣੇ ਰੈਸਟੋਰੈਂਟ ‘ਚ ਸਮਲਿੰਗੀਆਂ ਨੂੰ ਐਂਟ੍ਰੀ ਨਹੀਂ ਦੇ ਰਹੀ। ਇਸ ਨੂੰ ਲੈ ਕੇ ਸੋਸ਼ਲ ਮੀਡੀਆ ‘ਤੇ ਕਾਫ਼ੀ ਵਿਵਾਦ ਹੋ ਰਿਹਾ ਹੈ।
ਸੋਸ਼ਲ ਮੀਡੀਆ ‘ਤੇ ਚਲ ਰਹੀਆਂ ਖ਼ਬਰਾਂ ਦੇ ਮੁਤਾਬਿਕ ਸਮਲਿੰਗੀ ਪੁਰਸ਼ਾਂ ਨੂੰ ਤਾਂ ਰੈਸਟੋਰੈਂਟ ‘ਚ ਦਾਖ਼ਲੇ ਲਈ ਸਾਫ਼ ਇਨਕਾਰ ਕੀਤਾ ਜਾ ਰਿਹਾ ਹੈ ਜਦਕਿ ਟ੍ਰਾਂਸਵੁਮੈੱਨ ਭਾਵ ਸਮਲਿੰਗੀ ਮਹਿਲਾਵਾਂ ਦੇ ਕੱਪੜਿਆਂ ਨੂੰ ਦੇਖ ਕੇ ਰੈਸਟੋਰੈਂਟ ‘ਚ ਆਉਣ ਦੀ ਇਜਾਜ਼ਤ ਦਿੱਤੀ ਜਾ ਰਹੀ ਹੈ। ਇਸ ਮਾਮਲੇ ‘ਚ ਵਿਵਾਦ ਨੂੰ ਵਧਦੇ ਦੇਖਦੇ ਹੋਏ ਕੰਪਨੀ ਨੇ ਸਫ਼ਾਈ ਦਿੱਤੀ ਹੈ।
ਵਨ8 ਕਮਿਊਨ ਨੇ ਕਿਹਾ, ”ਅਸੀਂ ਬਿਨਾ ਕਿਸੇ ਵਿਤਕਰੇ ਦੇ ਸਾਰਿਆਂ ਦਾ ਸਵਾਗਤ ਅਤੇ ਸਨਮਾਨ ਕਰਦੇ ਹਾਂ। ਜਿਵੇਂ ਕਿ ਸਾਡਾ ਨਾਂ ਹੈ ਅਸੀਂ ਸਾਰੇ ਭਾਈਚਾਰਿਆਂ ਦੀ ਸੇਵਾ ‘ਚ ਹਮੇਸ਼ਾ ਅੱਗੇ ਹਾਂ। ਇੰਡਸਟ੍ਰੀ ਦੇ ਚਲਨ (ਰਿਵਾਜ) ਅਤੇ ਸਰਕਾਰੀ ਨਿਯਮਾਂ ਮੁਤਾਬਿਕ ਸਾਡੇ ਇੱਥੇ ਸਟੈਗ ਐਂਟ੍ਰੀ ਭਾਵ ਇਕੱਲੇ ਆਦਮੀ ਦੇ ਦਾਖ਼ਲੇ ‘ਤੇ ਰੋਕ ਹੈ। ਇਸ ਦਾ ਮਤਲਬ ਇਹ ਨਹੀਂ ਕਿ ਅਸੀਂ ਕਿਸੇ ਵੀ ਭਾਈਚਾਰੇ ਦੇ ਖ਼ਿਲਾਫ਼ ਹਾਂ, ਪਰ ਫ਼ਿਰ ਵੀ ਜੇਕਰ ਬੇਧਿਆਨੀ ‘ਚ ਕੋਈ ਘਟਨਾ ਵਾਪਰੀ ਹੈ ਜਾਂ ਕੋਈ ਗ਼ਲਤਫ਼ਹਿਮੀ ਹੋਈ ਹੈ ਤਾਂ ਅਸੀਂ ਚਾਹੁੰਦੇ ਹਾਂ ਕਿ ਉਹ ਵਿਅਕਤੀ ਸਾਨੂੰ ਮਿਲੇ, ਤਾਂ ਜੋ ਅਸੀਂ ਇਸ ਵਿਵਾਦ ਨੂੰ ਸਹੀ ਤਰੀਕੇ ਨਾਲ ਹਲ ਕਰ ਸਕੀਏ। ਗਾਹਕ ਸਾਡੀ ਤਰਜੀਹ ਹਨ ਅਤੇ ਉਸ ਨਾਲ ਮਜ਼ਬੂਤ ਤੇ ਲੰਬੇ ਸਬੰਧ ਬਣਾਉਣਾ ਸਾਡੀ ਪ੍ਰਣਾਲੀ (ਸਿਸਟਮ) ਦਾ ਹਿੱਸਾ ਹੈ।”
ਜ਼ਿਕਰਯੋਗ ਹੈ ਕਿ ਸਮਲਿੰਗੀ ਭਾਈਚਾਰੇ ਦੇ ਅਧਿਕਾਰਾਂ ਦੀ ਰੱਖਿਆ ਕਰਨ ਵਾਲੇ ਸਮੂਹ ਯੈੱਸ ਵੀ ਐਗਜ਼ਿਸਟ ਨੇ ਆਪਣੇ ਇੱਕ ਬਿਆਨ ‘ਚ ਕਿਹਾ, ”ਵਿਰਾਟ ਕੋਹਲੀ ਤੁਸੀਂ ਸ਼ਾਇਦ ਇਸ ਬਾਰੇ ਨਹੀਂ ਜਾਣਦੇ, ਪਰ ਪੁਣੇ ‘ਚ ਤੁਹਾਡਾ ਰੈਸਟੋਰੈਂਟ ਵਨ8 ਕਮਿਊਨ ਸਮਲਿੰਗੀ ਮਹਿਮਾਨਾਂ ਦੇ ਨਾਲ ਵਿਤਕਰਾ ਕਰਦਾ ਹੈ। ਹੋਰਨਾਂ ਬ੍ਰਾਂਚਾਂ ਦੀ ਵੀ ਇਸੇ ਤਰ੍ਹਾਂ ਦੀ ਨੀਤੀ ਹੈ। ਇਹ ਹੈਰਾਨੀਜਨਕ ਅਤੇ ਅਪ੍ਰਵਾਨ ਹੈ। ਉਮੀਦ ਹੈ ਕਿ ਤੁਸੀਂ ਛੇਤੀ ਇਸ ‘ਚ ਬਦਲਾਅ ਕਰੋਗੇ। ਜਾਂ ਤਾਂ ਰੈਸਟੋਰੈਂਟ ਨੂੰ ਸੰਵੇਦਨਸ਼ੀਲ ਬਣਾਉਣ ਲਈ ਬਿਹਤਰ ਕੰਮ ਕਰੋ ਜਾਂ ਵਿਤਕਰਾ ਕਰਨ ਵਾਲੇ ਕਾਰੋਬਾਰਾਂ ਨੂੰ ਬੰਦ ਕਰੋ।”ਜ਼ਿਕਰਯੋਗ ਹੈ ਕਿ ਵਿਰਾਟ ਦਿੱਲੀ ਸਮੇਤ ਪੁਣੇ ਅਤੇ ਕੋਲਕਾਤਾ ‘ਚ ਵਨ 8 ਕਮਿਊਨ ਰੈਸਟੋਰੈਂਟ ਚਲਾਉਂਦਾ ਹੈ।
