ਅਦਾਕਾਰਾ-ਪ੍ਰੋਡਿਊਸਰ ਪ੍ਰਿਯੰਕਾ ਚੋਪੜਾ ਜੋਨਜ਼ ਨੂੰ ਅੱਜ ਆਪਣੀ ਪਹਿਲੀ ਪੁਸਤਕ ਅਨਫ਼ਿਨਿਸ਼ਡ: ਏ ਮੈਮੋਆਰ ਦੇ ਰਿਲੀਜ਼ ਹੋਣ ਨਾਲ ਇੱਕ ਲੇਖਿਕਾ ਬਣਨ ਦਾ ਮਾਣ ਵੀ ਹਾਸਲ ਹੋ ਗਿਆ ਹੈ। ਇਸ ਪੁਸਤਕ ‘ਚ ਅਦਾਕਾਰਾ ਨੇ ਖ਼ੁਦ ਨੂੰ ਇਮਾਨਦਾਰ, ਅਧੂਰਾ ਅਤੇ ਕਮਜ਼ੋਰ ਦੱਸਿਆ ਹੈ। 60 ਤੋਂ ਵੱਧ ਬੌਲੀਵੁਡ ਅਤੇ ਹੌਲੀਵੁਡ ਫ਼ਿਲਮਾਂ ਅਤੇ ਸੋਅਜ਼ ‘ਚ ਕੰਮ ਕਰਨ ਵਾਲੀ ਅਦਾਕਾਰਾ ਨੇ ਪਿਛਲੇ ਸਾਲ ਕਰੋਨਾਵਾਇਰਸ ਮਹਾਂਮਾਰੀ ਕਾਰਨ ਲਾਗੂ ਤਾਲਾਬੰਦੀ ਦੌਰਾਨ ਆਪਣੀ ਗ਼ੈਰ-ਕਲਪਿਤ ਕਹਾਣੀ ਨੂੰ ਕਿਤਾਬੀ ਰੂਪ ਦਿੱਤਾ। ਪ੍ਰਿਯੰਕਾ ਨੇ ਆਖਿਆ, ”ਇਸ ਪੁਸਤਕ ਨੂੰ ਲਿਖਣ ‘ਚ ਦੋ ਸਾਲ ਲੱਗੇ, ਪਰ ਜ਼ਿਆਦਾਤਰ ਕੰਮ ਮੈਂ ਇਕਾਂਤਵਾਸ ਦੌਰਾਨ ਹੀ ਨੇਪਰੇ ਚਾੜ੍ਹਿਆ।
”ਮੈਂ ਪਿਛਲੇ ਛੇ ਮਹੀਨੇ ਤੋਂ ਘਰ ਸੀ। ਇਹ ਮੇਰੀ ਜ਼ਿੰਦਗੀ ਦਾ ਪਹਿਲਾ ਮੌਕਾ ਸੀ ਜਦੋਂ ਮੈਨੂੰ ਤਾਲਾਬੰਦੀ ਦੌਰਾਨ ਇੱਕ ਥਾਂ ਰਹਿਣ ਦਾ ਮੌਕਾ ਮਿਲਿਆ। ਮੈਂ ਸਮਝਦੀ ਹਾਂ ਕਿ ਤਾਲਾਬੰਦੀ ਨੇ ਪੁਸਤਕ ਲਿਖਣ ‘ਚ ਮੇਰੀ ਕਾਫ਼ੀ ਮਦਦ ਕੀਤੀ। ਮੈਂ ਆਪਣੀ ਜ਼ਿੰਦਗੀ ਬਾਰੇ ਲਿਖ ਚੁੱਕੀ ਹਾਂ ਪਰ ਕਦੇ ਕਿਤਾਬ ਨਹੀਂ ਲਿਖੀ। ਕੁੱਝ ਲਿਖਣਾ ਮੇਰੇ ਲਈ ਮਾਣ ਵਾਲੀ ਗੱਲ ਸੀ ਅਤੇ ਡਰ ਵੀ ਲੱਗਦਾ ਸੀ ਜਿਸ ਕਾਰਨ ਮੈਂ ਲਿਖਣਾ ਚਾਹੁੰਦੀ ਸੀ। ‘ ‘ਅਦਾਕਾਰਾ ਨੇ ਆਖਿਆ, ”ਮੈਂ ਆਸ ਕਰਦੀ ਹਾਂ ਕਿ ਜਿਹੜੇ ਲੋਕ ਮੈਨੂੰ ਜਾਣਦੇ ਹਨ ਉਹ ਮੈਨੂੰ ਇੱਕ ਸ਼ਖ਼ਸੀਅਤ ਅਤੇ ਇੱਕ ਲੜਕੀ ਵਾਂਗ ਦੇਖਣਗੇ। ਜਿਹੜੇ ਲੋਕ ਮੈਨੂੰ ਮੇਰੀ ਕਿਤਾਬ ਰਾਹੀਂ ਜਾਣਨਗੇ ਮੈਂ ਉਨ੍ਹਾਂ ਨੂੰ ਅਪੀਲ ਕਰਦੀ ਹਾਂ ਕਿ ਉਹ ਮੇਰੀ ਪਹਿਲੀ ਕੋਸ਼ਿਸ਼ ਲਈ ਮੈਨੂੰ ਇੱਕ ਮੌਕਾ ਦੇਣ ਕਿਉਂਕਿ ਇਹ ਇੱਕ ਛੋਟੇ ਸ਼ਹਿਰ ਦੀ ਲੜਕੀ ਦੀ ਕਹਾਣੀ ਹੈ ਜਿਸ ਨੇ ਆਪਣੇ ਦਮ ‘ਤੇ ਆਪਣਾ ਕਰੀਅਰ ਬਣਾਇਆ।”
