ਨਵੀਂ ਦਿੱਲੀ – ਭਾਰਤੀ ਤੇਜ਼ ਗੇਂਦਬਾਜ਼ ਮੁਹੰਮਦ ਸ਼ਮੀ ਦਾ ਚਾਹੇ ਇੰਗਲੈਂਡ ਦੌਰਾ ਸਫ਼ਲ ਰਿਹਾ ਹੋਵ, ੇ ਪਰ ਨਿਜੀ ਜ਼ਿੰਦਗੀ ਵਿੱਚ ਉਸ ਦੀਆਂ ਮੁਸੀਬਤਾਂ ਰੁਕਣ ਦਾ ਨਾਂ ਨਹੀਂ ਲੈ ਰਹੀਆਂ। ਇੱਕ ਵਾਰ ਫ਼ਿਰ ਉਸ ਦੀ ਪਤਨੀ ਹਸੀਨ ਜਹਾਂ ਦੀ ਵਜ੍ਹਾ ਕਾਰਨ ਸ਼ਮੀ ਦੀਆਂ ਮੁਸੀਬਤਾਂ ਵੱਧ ਸਕਦੀਆਂ ਹਨ। 20 ਸਤੰਬਰ ਨੂੰ ਕੋਲਕਾਤਾ ਦੇ ਅਲੀਪੁਰ ਦੀ ਸੀ. ਜੇ. ਐੱਮ. ਕੋਰਟ ਵਿੱਚ ਸ਼ਮੀ ਨੂੰ ਪੇਸ਼ ਹੋਣਾ ਸੀ, ਪਰ ਉਹ ਕੋਰਟ ਵਿੱਚ ਨਹੀਂ ਪਹੁੰਚਿਆ। ਸ਼ਮੀ ਦੇ ਵਕੀਲ ਨੇ ਜੱਜ ਨੂੰ ਕਿਹਾ ਕਿ ਉਹ ਕੁੱਝ ਕਾਰਨਾਂ ਤੋਂ ਨਹੀਂ ਆ ਸੱਕਿਆ ਜਿਸ ‘ਤੇ ਜੱਜ ਨਾਰਾਜ਼ ਹੋਏ ਅਤੇ ਜ਼ਾਹਿਰ ਹੈ ਕਿ ਸ਼ਮੀ ਹੁਣ ਗੰਭੀਰ ਮੁਸੀਬਤ ਵਿੱਚ ਫ਼ਸ ਸਕਦੈ।
ਦਰਅਸਲ, ਹਸੀਨ ਨੇ ਕ੍ਰਿਕਟਰ ਖ਼ਿਲਾਫ਼ ਮਾਮਲਾ ਦਰਜ ਕਰਾਉਣ ਤੋਂ ਬਾਅਦ ਕਿਹਾ ਸੀ ਕਿ ਜਦੋਂ ਉਹ ਚੈੱਕ ਜਮਾ ਕਰ ਕੇ ਪੈਸੇ ਕਢਵਾਉਣ ਗਈ ਤਾਂ ਪਤਾ ਚੱਲਿਆ ਕਿ ਸ਼ਮੀ ਨੇ ਉਸ ਨੂੰ ਬਾਊਂਸ ਚੈੱਕ ਦਿੱਤਾ ਸੀ। ਇਸ ਮਾਮਲੇ ਦੀ ਸੁਣਵਾਈ ਜਿਸ ਦਿਨ ਹੋਣੀ ਸੀ ਸ਼ਮੀ ਉੱਥੇ ਨਹੀਂ ਪਹੁੰਚਿਆ। ਸੂਤਰਾਂ ਮੁਤਾਬਿਕ, ਅਗਲੀ ਸੁਣਵਾਈ 14 ਨਵੰਬਰ ਨੂੰ ਹੋਣੀ ਹੈ, ਅਤੇ ਜੇਕਰ ਸ਼ਮੀ ਨਹੀਂ ਪਹੁੰਚਦਾ ਤਾਂ ਉਸ ਖ਼ਿਲਾਫ਼ ਗ਼ੈਰ-ਜ਼ਮਾਨਤੀ ਵਾਰੰਟ ਜਾਰੀ ਹੋ ਸਕਦਾ ਹੈ।
ਆਈ. ਪੀ. ਐੱਲ. ਦੀ ਫ਼੍ਰੈਂਚਾਈਜ਼ੀ ਕੋਲਕਾਤਾ ਨਾਈਟ ਰਾਈਡਰਜ਼ ਦੀ ਸਾਬਕਾ ਚੀਅਰਲੀਡਰ ਰਹਿ ਚੁੱਕੀ ਹਸੀਨ ਨੇ ਮੀਡੀਆ ਨਾਲ ਗੱਲਬਾਤ ਕਰਦੇ ਹੋਏ ਕਿਹਾ, ”ਉਸ ਨੇ ਆਪਣੇ ਪਤੀ ਕਾਰਨ ਆਪਣੇ ਕਰੀਅਰ ਨਾਲ ਸਮਝੌਤਾ ਕੀਤਾ ਜਦਕਿ ਉਹ ਅਜਿਹਾ ਨਹੀਂ ਕਰਨਾ ਚਾਹੁੰਦੀ ਸੀ। ਸਾਲ 2014 ਮੁਹੰਮਦ ਸ਼ਮੀ ਨਾਲ ਵਿਆਹ ਕਰਨ ਤੋਂ ਬਾਅਦ ਹਸੀਨ ਨੇ ਆਪਣਾ ਪੇਸ਼ਾ ਛੱਡ ਦਿੱਤਾ।
ਜ਼ਿਕਰਯੋਗ ਹੈ ਕਿ ਆਈ. ਪੀ. ਐੱਲ. ਸ਼ੁਰੂ ਹੋਣ ਤੋਂ ਪਹਿਲਾਂ ਹਸੀਨ ਨੇ ਸ਼ਮੀ ‘ਤੇ ਕਿਸੇ ਦੂਜੀ ਮਹਿਲਾ ਦੇ ਨਾਲ ਸਬੰਧ ਹੋਣ ਦੇ ਗੰਭੀਰ ਦੋਸ਼ ਲਗਾਏ ਸਨ। ਇਸ ਦੇ ਸਬੂਤ ਦੇ ਤੌਰ ‘ਤੇ ਉਸ ਨੇ ਚੈਟ ਦੇ ਸਕ੍ਰੀਨ ਸ਼ੌਟਸ ਅਤੇ ਕੁੱਝ ਰਿਕਾਰਡਿੰਗਜ਼ ਵੀ ਪੇਸ਼ ਕੀਤੇ ਸਨ। ਇਸ ਵਿਵਾਦ ਤੋਂ ਬਾਅਦ ਦੋਵੇਂ ਅਲੱਗ ਹੋ ਗਏ ਸਨ। ਉੱਥੇ ਹੀ ਹੁਣ ਫ਼ਿਰ ਤੋਂ ਸ਼ਮੀ ਦੀਆਂ ਮੁਸੀਬਤਾਂ ਵਧਦੀਆਂ ਨਜ਼ਰ ਆ ਰਹੀਆਂ ਹਨ।
