ਉਤਰ ਪ੍ਰਦੇਸ਼— ਰਾਜਧਾਨੀ ਲਖਨਊ ਦੇ ਕਾਕੋਰੀ ਦੇ ਜੇਹਤਾ ਰੋਡ ‘ਤੇ ਸਥਿਤ ਇਕ ਮਕਾਨ ‘ਚ ਸੋਮਵਾਰ ਨੂੰ ਵਿਸਫੋਟ ਦੀ ਖਬਰ ਹੈ। ਵਿਸਫੋਟ ਇੰਨਾ ਤੇਜ਼ ਸੀ ਕਿ ਆਸਪਾਸ ਦੇ ਇਲਾਕੇ ‘ਚ ਇਸ ਦੀ ਧਮਕ ਮਹਿਸੂਸ ਕੀਤੀ ਗਈ। ਜਾਣਕਾਰੀ ਮੁਤਾਬਕ ਵਿਸਫੋਟ ‘ਚ 2 ਲੋਕਾਂ ਦੀ ਮੌਤ ਹੋ ਗਈ ਜਦਕਿ ਕਈ ਲੋਕਾਂ ਦੇ ਜ਼ਖਮੀ ਹੋਣ ਦੀ ਗੱਲ ਕੀਤੀ ਜਾ ਰਹੀ ਹੈ। ਮੌਕੇ ‘ਤੇ ਪੁਲਸ ਪੁੱਜ ਗਈ। ਰਾਹਤ ਬਚਾਅ ਕੰਮ ਸ਼ੁਰੂ ਹੋ ਗਿਆ ਹੈ।
ਰਿਪੋਰਟ ਮੁਤਾਬਕ ਧਮਾਕਾ ਕਾਕੋਰੀ ਦੇ ਮੁੰਨਾਖੇੜਾ ‘ਚ ਸੰਜੈ ਲੋਧੀ ਦੇ ਮਕਾਨ ‘ਚ ਹੋਇਆ। ਸ਼ੁਰੂਆਤੀ ਜਾਣਕਾਰੀ ‘ਚ ਪਤਾ ਚੱਲਿਆ ਹੈ ਕਿ ਮਕਾਨ ਮਾਲਕ ਸੰਜੈ ਨੇ ਮ੍ਰਿਤਕ ਨਾਸਿਰ ਪਟਾਕੇ ਵਾਲੇ ਨੂੰ ਮਕਾਨ ਕਿਰਾਏ ‘ਤੇ ਦੇ ਰੱਖਿਆ ਸੀ। ਸ਼ੁਰੂਆਤੀ ਜਾਂਚ ‘ਚ ਪਤਾ ਚੱਲਿਆ ਹੈ ਕਿ ਵਿਸਫੋਟ ਪਟਾਕੇ ਕਾਰਨ ਹੋਇਆ ਹੈ। ਘਟਨਾ ਸਥਾਨ ‘ਤੇ ਹੁਣ ਤੱਕ ਦੋ ਲਾਸ਼ਾਂ ਕੱਢੀਆਂ ਜਾ ਚੁੱਕੀਆਂ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਮਕਾਨ ਦੇ ਮਲਬੇ ‘ਚ ਕੁਝ ਹੋਰ ਲੋਕ ਦਬੇ ਹੋ ਸਕਦੇ ਹਨ।
ਮਕਾਨ ‘ਚ ਨਾਸਿਰ ਪਟਾਕੇ ਬਣਾਉਣ ਲਈ ਗੈਰ-ਕਾਨੂੰਨੀ ਰੂਪ ਤੋਂ ਬਾਰੂਦ ਇੱਕਠਾ ਕਰਦਾ ਸੀ। ਉਹ ਆਸਪਾਸ ਦੇ ਇਲਾਕੇ ‘ਚ ਬਾਰੂਦ ਸਪਲਾਈ ਕਰਦਾ ਸੀ। ਲੋਕਾਂ ਮੁਤਾਬਕ ਧਮਾਕੇ ‘ਚ ਨਾਸਿਰ ਦੀ ਮੌਤ ਹੋ ਚੁੱਕੀ ਹੈ। ਘਰ ‘ਚ ਉਸ ਦੀ ਪਤਨੀ ਵੀ ਸੀ, ਜਿਸ ਦਾ ਹੁਣ ਤੱਕ ਪਤਾ ਨਹੀਂ ਚੱਲ ਸਕਿਆ ਹੈ।
ਲੋਕਾਂ ਨੇ ਦੱਸਿਆ ਕਿ ਧਮਾਕੇ ਕਾਰਨ ਨਾਲ ਦੀ ਫੈਕਟਰੀ ਦਾ ਮਾਲਕ ਵੀ ਲਪੇਟ ‘ਚ ਆ ਗਿਆ, ਜਿਸ ਨਾਲ ਉਸ ਦੀ ਮੌਕੇ ‘ਤੇ ਮੌਤ ਹੋ ਗਈ। ਮੌਤਾਂ ਨੂੰ ਲੈ ਕੇ ਹੁਣ ਤੱਕ ਪ੍ਰਸ਼ਾਸਨ ਵੱਲੋਂ ਕੋਈ ਪੁਸ਼ਟੀ ਨਹੀਂ ਕੀਤੀ ਗਈ ਹੈ। ਧਮਾਕੇ ਦੀ ਸੂਚਨਾ ਦੇ ਬਾਅਦ ਆਸਪਾਸ ਦੇ ਥਾਣਿਆਂ ਦੀ ਪੁਲਸ ਫੋਰਸ ਮੌਕੇ ‘ਤੇ ਪੁੱਜ ਗਈ ਹੈ। ਪੁਲਸ ਦੇ ਨਾਲ ਹੀ ਮੌਕੇ ‘ਤੇ ਇਲਾਕੇ ਦੇ ਲੋਕ ਵੀ ਰਾਹਤ ਬਚਾਅ ਕੰਮ ‘ਚ ਜੁੱਟੇ ਹੋਏ ਹਨ।
