ਸਿਡਨੀ – ਸਿਡਨੀ ਦੇ ਇਕ ਹਸਪਤਾਲ ‘ਚ ਤਿੰਨ ਸੁਰੱਖਿਆ ਕਰਮੀਆਂ ਅਤੇ ਇਕ ਪੁਰਸ਼ ਨਰਸ ਦੇ ਜ਼ਖ਼ਮੀ ਹੋਣ ਤੋਂ ਬਾਅਦ ਚਾਕੂ ਨਾਲ ਲੈਸ ਅਪਰਾਧੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਸ਼ੁੱਕਰਵਾਰ ਰਾਤ ਸਥਾਨਕ ਸਮੇਂ ਅਨੁਸਾਰ ਕਰੀਬ 11.30 ਵਜੇ, ਵੇਸਟਮੀਡ ਦੇ ਇਕ ਹਸਪਤਾਲ ‘ਚ ਇਕ ਵਿਅਕਤੀ ਵਲੋਂ ਕਰਮਚਾਰੀਆਂ ‘ਤੇ ਹਮਲਾ ਕਰਨ ਦੀ ਰਿਪੋਰਟ ਤੋਂ ਬਾਅਦ ਪੁਲਸ ਨੂੰ ਬੁਲਾਇਆ ਗਿਆ। ਸਿਹਤ ਖੇਤਰ ਸਿਡਨੀ ਦੇ ਕੇਂਦਰੀ ਵਪਾਰਕ ਜ਼ਿਲ੍ਹੇ ਤੋਂ ਲਗਭਗ 20 ਕਿਲੋਮੀਟਰ ਪੱਛਮ ‘ਚ ਸਥਿਤ ਹੈ। ਅਧਿਕਾਰੀਆਂ ਨੂੰ ਦੱਸਿਆ ਗਿਆ ਕਿ ਇਕ 39 ਸਾਲਾ ਵਿਅਕਤੀ ਨੇ 25 ਅਤੇ 24 ਸਾਲ ਦੀ ਉਮਰ ਦੇ 2 ਪੁਰਸ਼ ਸੁਰੱਖਿਆ ਕਰਮੀਆਂ ਨੂੰ ਚਾਕੂ ਮਾਰ ਦਿੱਤਾ ਸੀ, ਜਦੋਂ ਕਿ ਤੀਜੇ ਪੁਰਸ਼ ਸੁਰੱਖਿਆ ਕਰਮੀ ਦੇ ਮੋਢੇ ‘ਤੇ ਸੱਟ ਲੱਗੀ ਸੀ। ਇਸ ਤੋਂ ਇਲਾਵਾ 29 ਸਾਲਾ ਇਕ ਪੁਰਸ਼ ਨਰਸ ਨੂੰ ਵੀ ਮਾਮੂਲੀ ਸੱਟਾਂ ਲੱਗੀਆਂ ਹਨ।
ਨਿਊ ਸਾਊਥ ਵੇਲਸ ਪੁਲਸ ਫ਼ੋਰਸ ਨੇ ਪੁਸ਼ਟੀ ਕੀਤੀ ਹੈ ਕਿ ਪੁਰਸ਼ ਅਪਰਾਧੀ ਹਸਪਤਾਲ ‘ਚ ਪੁਲਸ ਦੀ ਨਿਗਰਾਨੀ ‘ਚ ਹੈ ਅਤੇ ਪੁੱਛ-ਗਿੱਛ ਜਾਰੀ ਹੈ। ਆਸਟ੍ਰੇਲੀਆਈ ਬ੍ਰਾਡਕਾਸਟਿੰਗ ਕਾਰਪੋਰੇਸ਼ਨ ਦੀ ਰਿਪੋਰਟ ਅਨੁਸਾਰ, ਉਹ ਹਸਪਤਾਲ ‘ਚ ਇਕ ਮਰੀਜ਼ ਸੀ ਅਤੇ ਉਸ ਨੂੰ ਕਾਬੂ ਕਰਨ ਦੀ ਕੋਸ਼ਿਸ਼ ‘ਚ ਸਾਰੇ ਚਾਰ ਸਟਾਫ਼ ਮੈਂਬਰ ਜ਼ਖ਼ਮੀ ਹੋ ਗਏ।
