ਚੰਡੀਗੜ੍ਹ : ਪੰਜਾਬ ‘ਚ 4 ਵਿਧਾਨ ਸਭਾ ਹਲਕਿਆਂ ‘ਚ ਹੋ ਰਹੀਆਂ ਜ਼ਿਮਨੀ ਚੋਣਾਂ ‘ਚੋਂ ਸਾਬਕਾ ਮੁੱਖ ਮੰਤਰੀ ਅਤੇ ਜਲੰਧਰ ਤੋਂ ਸੰਸਦ ਮੈਂਬਰ ਚਰਨਜੀਤ ਸਿੰਘ ਚੰਨੀ ਬਿਲਕੁਲ ਗਾਇਬ ਹਨ। ਚੰਨੀ ਅਜੇ ਤੱਕ ਚੱਬੇਵਾਲ ਸੀਟ ‘ਤੇ ਹੋ ਰਹੀ ਜ਼ਿਮਨੀ ਚੋਣ ‘ਚ ਪ੍ਰਚਾਰ ਲਈ ਵੀ ਨਹੀਂ ਗਏ ਹਨ। ਹਾਲਾਂਕਿ ਮੰਨਿਆ ਜਾ ਰਿਹਾ ਹੈ ਕਿ ਆਖ਼ਰੀ 4-5 ਦਿਨਾਂ ‘ਚ ਉਹ ਚੱਬੇਵਾਲ ਸੀਟ ‘ਤੇ ਪ੍ਰਚਾਰ ਦੀ ਕਮਾਨ ਸੰਭਾਲ ਸਕਦੇ ਹਨ ਕਿਉਂਕਿ ਆਲ ਇੰਡੀਆ ਕਾਂਗਰਸ ਨੇ ਉਨ੍ਹਾਂ ਨੂੰ ਮਹਾਰਾਸ਼ਟਰ ਚੋਣਾਂ ‘ਚ ਆਬਜ਼ਰਵਰ ਬਣਾਇਆ ਹੈ।
ਪਾਰਟੀ ਦਾ ਮੰਨਣਾ ਹੈ ਕਿ ਚੰਨੀ ਚੱਬੇਵਾਲ ਸੀਟ ‘ਤੇ ਅਹਿਮ ਭੂਮਿਕਾ ਨਿਭਾ ਸਕਦੇ ਹਨ ਕਿਉਂਕਿ ਜਿਨ੍ਹਾਂ ਵਿਧਾਨ ਸਭਾ ਸੀਟਾਂ ‘ਤੇ ਜ਼ਿਮਨੀ ਚੋਣਾਂ ਹੋ ਰਹੀਆਂ ਹਨ, ਉਨ੍ਹਾਂ ‘ਚੋਂ ਚੱਬੇਵਾਲ ਇਕਮਾਤਰ ਰਾਖਵੀਂ ਸੀਟ ਹਨ। ਕਾਂਗਰਸ ਵਲੋਂ ਸਾਲ 2022 ‘ਚ ਚਰਨਜੀਤ ਸਿੰਘ ਚੰਨੀ ਨੂੰ ਮੁੱਖ ਮੰਤਰੀ ਬਣਾਉਣ ਤੋਂ ਬਾਅਦ ਉਹ ਤੇਜ਼ੀ ਨਾਲ ਦਲਿਤ ਨੇਤਾ ਵੱਜੋਂ ਉੱਭਰੇ ਸਨ। 2022 ‘ਚ ਚੰਨੀ 2 ਵਿਧਾਨ ਸਭਾ ਸੀਟਾਂ ‘ਤੇ ਚੋਣਾਂ ਲੜੇ ਪਰ ਹਾਰ ਗਏ।
ਸਾਲ 2024 ਦੀਆਂ ਲੋਕ ਸਭਾ ਚੋਣਾਂ ‘ਚ ਪਾਰਟੀ ਨੇ ਉਨ੍ਹਾਂ ‘ਤੇ ਜਲੰਧਰ ਤੋਂ ਦਾਅ ਖੇਡਿਆ। ਚੰਨੀ ਨੇ ਜਲੰਧਰ ਸੀਟ ‘ਤੇ ਸ਼ਾਨਦਾਰ ਜਿੱਤ ਹਾਸਲ ਕੀਤੀ। ਚੱਬੇਵਾਲ ਵਿਧਾਨ ਸਭਾ ਹਲਕਾ ਵੀ ਦੋਆਬਾ ‘ਚ ਆਉਂਦਾ ਹੈ। ਅਜਿਹੇ ‘ਚ ਪਾਰਟੀ ਨੂੰ ਚੰਨੀ ਤੋਂ ਵੱਡੀਆਂ ਉਮੀਦਾਂ ਹਨ। ਸੂਤਰਾਂ ਦੇ ਮੁਤਾਬਕ ਚਰਨਜੀਤ ਸਿੰਘ ਚੰਨੀ ਨੇ ਪਾਰਟੀ ਲੀਡਰਸ਼ਿਪ ਨੂੰ ਭਰੋਸਾ ਦੁਆਇਆ ਹੈ ਕਿ ਆਖ਼ਰੀ ਦਿਨਾਂ ‘ਚ ਉਹ ਪਾਰਟੀ ਲ਼ਈ ਪ੍ਰਚਾਰ ਕਰਨ ਲਈ ਚੱਬੇਵਾਲ ਜਾਣਗੇ।
