ਜਲੰਧਰ — ਜਲੰਧਰ ‘ਚ ਕੋਰੋਨਾ ਵਾਇਰਸ ਦੇ ਪੂਰੀ ਤਰ੍ਹਾਂ ਤੜਥੱਲੀ ਮਚਾ ਦਿੱਤੀ ਹੈ। ਕਿਲਾ ਮੁਹੱਲਾ ਅਤੇ ਸ਼ਾਹਕੋਟ ‘ਚੋਂ ਦੋ ਪਾਜ਼ੀਟਿਵ ਕੇਸ ਮਿਲਣ ਤੋਂ ਬਾਅਦ ਹੁਣ ਜਲੰਧਰ ‘ਚੋਂ ਚਾਰ ਹੋਰ ਪਾਜ਼ੀਟਿਵ ਕੇਸ ਪਾਏ ਗਏ ਹਨ।
ਇਨ੍ਹਾਂ ਇਲਾਕਿਆਂ ‘ਚੋਂ ਮਿਲੇ ਹੁਣ ਚਾਰ ਕੇਸ
ਸਿਹਤ ਵਿਭਾਗ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਹੁਣ ਮਿਲੇ ਚਾਰ ਕੇਸਾਂ ‘ਚੋਂ ਇਕ ਕੇਸ ਬਸਤੀ ਸ਼ੇਖ ਦਾ ਸਾਹਮਣੇ ਆਇਆ ਹੈ, ਜਿੱਥੇ 59 ਸਾਲ ਦਾ ਵਿਅਕਤੀ ਕੋਰੋਨਾ ਪਾਜ਼ੀਟਿਵ ਪਾਇਆ ਗਿਆ ਹੈ ਅਤੇ ਦੂਜਾ ਕੇਸ ਰਾਜਾ ਗਾਰਡਨ ਦੀ ਰਹਿਣ ਵਾਲੀ 32 ਸਾਲਾ ਔਰਤ ਕੋਰੋਨਾ ਪਾਜ਼ੀਟਿਵ ਪਾਈ ਗਈ ਹੈ। ਇਸ ਦੇ ਨਾਲ ਹੀ ਪੁਰਾਣੀ ਸਬਜ਼ੀ ਮੰਡੀ ‘ਚੋਂ 42 ਸਾਲਾ ਔਰਤ ਕੋਰੋਨਾ ਪਾਜ਼ੀਟਿਵ ਪਾਈ ਗਈ ਹੈ ਅਤੇ ਚੌਥਾ ਕੇਸ ਲਿੰਕ ਰੋਡ ਮਾਡਲ ਟਾਊਨ ‘ਚੋਂ 30 ਸਾਲਾ ਔਰਤ ਪਾਜ਼ੀਟਿਵ ਪਾਈ ਗਈ ਹੈ।
ਇਥੇ ਦੱਸ ਦੇਈਏ ਕਿ 2 ਪਾਜ਼ੀਟਿਵ ਕੇਸ ਪਹਿਲਾਂ ਦੁਪਹਿਰ ਨੂੰ ਮਿਲੇ ਸਨ ਜਦਕਿ ਸ਼ਾਮ ਨੂੰ 4 ਹੋਰ ਪਾਜ਼ੀਟਿਵ ਕੇਸ ਪਾਏ ਜਾਣ ਤੋਂ ਬਾਅਦ ਜਲੰਧਰ ‘ਚ ਕੁੱਲ ਪਾਜ਼ੀਟਿਵ ਕੇਸਾਂ ਦੀ ਕੁੱਲ ਗਿਣਤੀ 31 ਤੱਕ ਪਹੁੰਚ ਗਈ ਹੈ। ਦੁਪਹਿਰ ਨੂੰ ਮਿਲੇ 2 ਕੇਸਾਂ ‘ਚ ਸ਼ਾਹਕੋਟ ‘ਚੋਂ ਕੁਲਜੀਤ ਕੌਰ ਦਾ ਪਤੀ ਮਲਕੀਤ ਸਿੰਘ ਕੋਰੋਨਾ ਪਾਜ਼ੀਟਿਵ ਪਾਇਆ ਗਿਆ ਸੀ ਅਤੇ ਇਕ ਕੇਸ ਕਿਲਾ ਮੁਹੱਲੇ ‘ਚੋਂ ਸਾਹਮਣੇ ਆਇਆ ਸੀ, ਜਿੱਥੇ ਦੀਪਕ ਸ਼ਰਮਾ ਦੇ ਨਾਲ ਰਹਿਣ ਵਾਲਾ ਸਰਨੀਤ ਕਪੂਰ (40) ਕੋਰੋਨਾ ਪਾਜ਼ੀਟਿਵ ਪਾਇਆ ਗਿਆ ਸੀ। ਜਲੰਧਰ ‘ਚ ਇਕੋ ਦਿਨ 6 ਕੇਸ ਪਾਜ਼ੀਟਿਵ ਮਿਲਣ ‘ਤੇ ਸਿਹਤ ਵਿਭਾਗ ‘ਚ ਵੀ ਹਲਚਲ ਮਚ ਗਈ ਹੈ ਅਤੇ ਪੂਰੀ ਤਰ੍ਹਾਂ ਚੌਕਸ ਹੋ ਗਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਸਾਰੇ ਪੁਰਾਣੇ ਕੋਰੋਨਾ ਪਾਜ਼ੀਟਿਵ ਕੇਸਾਂ ਦੇ ਲਿੰਕ ‘ਚ ਸਨ।
