ਕਿਊਟੋ : ਦੱਖਣੀ ਇਕਵਾਡੋਰ ਅਤੇ ਉੱਤਰੀ ਪੇਰੂ ‘ਚ ਸ਼ਨੀਵਾਰ ਨੂੰ ਭੂਚਾਲ ਦੇ ਤੇਜ਼ ਝਟਕਿਆਂ ਕਾਰਨ ਘੱਟੋ-ਘੱਟ ਇਕ ਦਰਜਨ ਲੋਕਾਂ ਦੀ ਮੌਤ ਹੋ ਗਈ ਤੇ ਕਈ ਹੋਰ ਮਲਬੇ ਹੇਠ ਫਸ ਗਏ। ਬਚਾਅ ਟੀਮਾਂ ਵੱਲੋਂ ਜੰਗੀ ਪੱਧਰ ‘ਤੇ ਬਚਾਅ ਕਾਰਜ ਕੀਤੇ ਜਾ ਰਹੇ ਹਨ। ਅਮਰੀਕੀ ਭੂ-ਵਿਗਿਆਨ ਸਰਵੇਖਣ ਨੇ ਦੇਸ਼ ਦੇ ਤੱਟਵਰਤੀ ਗੁਯਾਸ ਖੇਤਰ ਵਿੱਚ 6.7 ਤੀਬਰਤਾ ਦੇ ਭੂਚਾਲ ਦੀ ਸੂਚਨਾ ਦਿੱਤੀ ਹੈ।
ਭੂਚਾਲ ਦਾ ਕੇਂਦਰ ਇਕਵਾਡੋਰ ਦੇ ਦੂਜੇ ਸਭ ਤੋਂ ਵੱਡੇ ਸ਼ਹਿਰ ਗੁਆਯਾਕਿਲ ਤੋਂ ਲਗਭਗ 50 ਮੀਲ (80 ਕਿਲੋਮੀਟਰ) ਦੱਖਣ ਵਿੱਚ ਕੇਂਦਰਿਤ ਸੀ। ਇਕਵਾਡੋਰ ਦੇ ਰਾਸ਼ਟਰਪਤੀ ਗੁਲੇਰਮੋ ਲਾਸੋ ਨੇ ਰਾਸ਼ਟਰ ਨੂੰ ਇਕ ਟੈਲੀਵਿਜ਼ਨ ਸੰਬੋਧਨ ‘ਚ ਕਿਹਾ ਕਿ ਭੂਚਾਲ ਕਾਰਨ 12 ਲੋਕ ਮਾਰੇ ਗਏ ਹਨ। ਸੋਸ਼ਲ ਮੀਡੀਆ ‘ਤੇ ਸ਼ੇਅਰ ਕੀਤੀਆਂ ਗਈਆਂ ਵੀਡੀਓਜ਼ ‘ਚ ਲੋਕਾਂ ਨੂੰ ਗੁਆਯਾਕਿਲ ਦੀਆਂ ਸੜਕਾਂ ‘ਤੇ ਇਕੱਠੇ ਹੁੰਦੇ ਦੇਖਿਆ ਜਾ ਸਕਦਾ ਹੈ। ਉੱਤਰੀ ਪੇਰੂ ਵਿੱਚ ਵੀ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ।
ਭੂਚਾਲ ਦੇ ਝਟਕੇ ਪੇਰੂ ਵਿੱਚ ਵੀ ਮਹਿਸੂਸ ਕੀਤੇ ਗਏ ਪਰ ਕਿਸੇ ਵੀ ਮੌਤ ਜਾਂ ਜ਼ਖ਼ਮੀ ਦੀ ਤੁਰੰਤ ਰਿਪੋਰਟ ਨਹੀਂ ਕੀਤੀ ਗਈ। 2016 ਵਿੱਚ ਦੇਸ਼ ਦੇ ਇਕ ਘੱਟ ਆਬਾਦੀ ਵਾਲੇ ਖੇਤਰ ਵਿੱਚ ਪ੍ਰਸ਼ਾਂਤ ਤੱਟ ‘ਤੇ ਉੱਤਰ ਵੱਲ ਕੇਂਦਰਿਤ ਭੂਚਾਲ ਕਾਰਨ 600 ਤੋਂ ਵੱਧ ਲੋਕ ਮਾਰੇ ਗਏ ਸਨ।














