ਸਰਦੀਆਂ ਦਾ ਮੌਸਮ ਜਿੱਥੇ ਠੰਡਕ ਅਤੇ ਆਰਾਮ ਲੈ ਕੇ ਆਉਂਦਾ ਹੈ, ਉੱਥੇ ਹੀ ਇਹ ਸਮਾਂ ਕਈ ਲੋਕਾਂ ਲਈ ਸਿਹਤ ਸੰਬੰਧੀ ਸਮੱਸਿਆਵਾਂ ਦਾ ਕਾਰਨ ਵੀ ਬਣ ਜਾਂਦਾ ਹੈ। ਠੰਢ ਦੇ ਦਿਨਾਂ ‘ਚ ਸ਼ਰੀਰ ਦੀ ਰੋਗ ਪ੍ਰਤੀਰੋਧਕ ਸਮਰਥਾ ਘੱਟ ਸਕਦੀ ਹੈ ਜਿਸ ਕਾਰਨ ਵਾਰ ਵਾਰ ਜ਼ੁਕਾਮ, ਥਕਾਵਟ, ਜੋੜਾਂ ਦੀ ਜਕੜਨ ਅਤੇ ਚਮੜੀ ਦੇ ਸੁੱਕੇਪਨ ਵਰਗੀਆਂ ਸਮੱਸਿਆਵਾਂ ਵੱਧ ਜਾਂਦੀਆਂ ਹਨ। ਅਜਿਹੇ ‘ਚ ਮਾਹਿਰਾਂ ਦਾ ਮੰਨਣਾ ਹੈ ਕਿ ਖ਼ੁਰਾਕ ‘ਚ ਛੋਟੇ-ਮੋਟੇ ਬਦਲਾਅ ਕਰ ਕੇ ਵੀ ਸਿਹਤ ਨੂੰ ਸੁਧਾਰਿਆ ਜਾ ਸਕਦਾ ਹੈ। ਇਨ੍ਹਾਂ ‘ਚੋਂ ਇੱਕ ਹੈ ਮੋਰਿੰਗਾ ਪਾਊਡਰ।
ਮੋਰਿੰਗਾ ਪਾਊਡਰ ਕਿਉਂ ਹੈ ਖਾਸ? ਮੋਰਿੰਗਾ ਜਾਂ ਸਹਜਣ ਦੀਆਂ ਪੱਤੀਆਂ ਤੋਂ ਬਣਿਆ ਪਾਊਡਰ ਪੋਸ਼ਕ ਤੱਤਾਂ ਦਾ ਵਧੀਆ ਸਰੋਤ ਮੰਨਿਆ ਜਾਂਦਾ ਹੈ। ਇਸ ‘ਚ ਵਾਇਟਾਮਿਨ A, C, E, B-complex, ਕੈਲਸ਼ੀਅਮ, ਆਇਰਨ ਅਤੇ ਪੋਟੈਸ਼ੀਅਮ ਵਰਗੇ ਜ਼ਰੂਰੀ ਤੱਤ ਮਿਲਦੇ ਹਨ। ਖੋਜਾਂ ਅਨੁਸਾਰ ਇਸ ‘ਚ ਮੌਜੂਦ ਐਂਟੀਔਕਸੀਡੈਂਟਸ ਸ਼ਰੀਰ ‘ਚ ਔਕਸੀਕਰਨ ਤਨਾਅ ਨੂੰ ਘਟਾਉਣ ‘ਚ ਮਦਦ ਕਰਦੇ ਹਨ ਜਿਸ ਨਾਲ ਇਮਿਊਨ ਸਿਸਟਮ ਨੂੰ ਮਜ਼ਬੂਤੀ ਮਿਲਦੀ ਹੈ।
ਇਮਿਊਨਿਟੀ ਲਈ ਲਾਭਕਾਰੀ: ਮੋਰਿੰਗਾ ਪਾਊਡਰ ‘ਚ ਮੌਜੂਦ ਵਾਇਟਾਮਿਨ C, ਵਾਇਟਾਮਿਨ E ਅਤੇ ਆਇਰਨ ਸ਼ਰੀਰ ਦੀ ਰੋਗ ਪ੍ਰਤੀਰੋਧਕ ਸਮਰਥਾ ਨੂੰ ਮਜ਼ਬੂਤ ਬਣਾਉਣ ‘ਚ ਸਹਾਇਕ ਹੋ ਸਕਦੇ ਹਨ। ਅਧਿਐਨਾਂ ‘ਚ ਇਹ ਪਤਾ ਲੱਗਿਆ ਹੈ ਕਿ ਇਸ ‘ਚ ਪਾਏ ਜਾਂਦੇ ਪੌਲੀਫ਼ੀਨੋਲ ਅਤੇ ਫ਼ਲੈਵਨੌਇਡ ਸ਼ਰੀਰ ‘ਚ ਹੋਣ ਵਾਲੀ ਸੋਜ ਨੂੰ ਘਟਾਉਣ ‘ਚ ਮਦਦ ਕਰਦੇ ਹਨ। ਹਰ ਰੋਜ਼ ਲਗਭਗ ਪੰਜ ਗ੍ਰਾਮ ਮੋਰਿੰਗਾ ਪਾਊਡਰ ਲੈਣ ਨਾਲ ਬਲੱਡ ਸ਼ੂਗਰ ਅਤੇ ਲਿਪਿਡ ਪ੍ਰੋਫ਼ਾਈਲ ਵਰਗੇ ਮਟੈਬਲਿਕ ਪੈਰਾਮੀਟਰਾਂ ‘ਚ ਸੁਧਾਰ ਆ ਸਕਦਾ ਹੈ।
ਚਮੜੀ ਦੀ ਦੇਖਭਾਲ ‘ਚ ਵੀ ਲਾਭਕਾਰੀ: ਸਰਦੀਆਂ ‘ਚ ਚਮੜੀ ਦਾ ਸੁੱਕਾਪਨ ਇੱਕ ਆਮ ਸਮੱਸਿਆ ਹੈ। ਮੋਰਿੰਗਾ ਪਾਊਡਰ ‘ਚ ਮੌਜੂਦ ਵਾਇਟਾਮਿਨਜ਼ A ਅਤੇ E ਚਮੜੀ ਨੂੰ ਅੰਦਰੋਂ ਪੋਸ਼ਣ ਦੇਣ ‘ਚ ਮਦਦ ਕਰਦੇ ਹਨ। ਇਹ ਤੱਤ ਚਮੜੀ ਦੀ ਨਮੀ ਬਣਾਈ ਰੱਖਣ, ਲਚਕੀਲਾਪਨ ਵਧਾਉਣ ਅਤੇ ਸੁੱਕਾਪਨ ਘਟਾਉਣ ‘ਚ ਸਹਾਇਕ ਮੰਨੇ ਜਾਂਦੇ ਹਨ।
ਮੋਰਿੰਗਾ ਪਾਊਡਰ ਦਾ ਸਹੀ ਸੇਵਨ ਕਿਵੇਂ ਕਰੀਏ: ਮਾਹਿਰਾਂ ਅਨੁਸਾਰ ਸਰਦੀਆਂ ‘ਚ ਹਰ ਰੋਜ਼ ਸਵੇਰੇ ਖਾਲੀ ਪੇਟ ਜਾਂ ਗੁੰਨਗੁਨੇ ਪਾਣੀ ਜਾਂ ਸਮੂਦੀ ਦੇ ਨਾਲ ਲਗਭਗ ਇੱਕ ਚੱਮਚ (ਦੋ ਤੋਂ ਪੰਜ ਗ੍ਰਾਮ) ਮੋਰਿੰਗਾ ਪਾਊਡਰ ਲਿਆ ਜਾ ਸਕਦਾ ਹੈ। ਹਾਲਾਂਕਿ ਕਿਸੇ ਵੀ ਸਪਲੀਮੈਂਟ ਨੂੰ ਨਿਯਮਿਤ ਤੌਰ ‘ਤੇ ਲੈਣ ਤੋਂ ਪਹਿਲਾਂ ਆਪਣੇ ਡਾਕਟਰ ਜਾਂ ਪੋਸ਼ਣ ਵਿਸ਼ੇਸ਼ਗਿਆ ਨਾਲ ਸਲਾਹ ਲੈਣਾ ਜ਼ਰੂਰੀ ਹੈ।
